БИЫЛҒЫ ЖЫЛДЫҢ 10 АЙЫНДА ШЫМКЕНТ ҚАЛАСЫ ЭКОНОМИКАСЫНЫҢ ӨСІМІ 14,8%-ДЫ ҚҰРАДЫ

11.12.2025 12:17

2025 жылдың 10 айында Шымкент қаласы экономикасының өсімі 14,8%-ды құрап, өңір республика бойынша алдыңғы қатардан орын алды.

Оның ішінде, сауда көлемі 24,6%-ға, байланыс 18,3%-ға, өнеркәсіп өнімі 14,7%-ға, құрылыс жұмыстары 7%-ға, инвестиция 4,7%-ға өсіп, 982 мың шаршы метр тұрғын үй пайдалануға берілді. Бұл туралы ОКҚ алаңында қала әкімі Ғабит Сыздықбеков хабарлды.

Оның айтуынша, экономика өсімінің драйвері өңдеу өнеркәсібінде өндірілген өнім көлемі өткен жылдың сәйкес кезеңімен салыстырғанда 16,5%-ға өсті. Соңғы 3 жылда өнеркәсіп саласында құны 150 млрд теңгені құрайтын 40 жоба іске қосылып, 2,5 мыңнан астам жұмыс орны құрылды.

«Мегаполисте өндірістік аймақтарды дамыту арқылы инвесторлар тарту және тұрақты жұмыс орындарын құру мақсатында жаңадан 2 өндірістік аймақ салу және 3 аймақты кеңейту жұмыстары жүргізілуде. Бұл аймақтарда 900 млрд теңгені құрайтын 300 инвестициялық жоба іске асырылып, 13 мыңға жуық жұмыс орны құрылады», - деді спикер баспасөз конференциясы барысында.