​Шымкентте биыл мың шақырымнан астам жолға асфальт төселді

Шымкент қаласында жол-көлік инфрақұрылымын дамыту бағытында бұрын-соңды болмаған ауқымды жұмыстар атқарылуда. Мемлекет басшысының жергілікті жолдардың 95 пайызының сапасын жақсарту жөніндегі тапсырмасын орындау мақсатында қала билігі жол құрылысының қарқынын бірнеше есеге арттырды.

Орталық коммуникациялар қызметінде өткен брифингте қала әкімі Ғабит Сыздықбеков жол саласындағы рекордтық көрсеткіштер мен стратегиялық нысандардың барысы туралы баяндады. Егер өткен жылы қала бойынша 270 шақырым жол жөнделсе, биыл бұл көрсеткіш төрт есеге артып, 1 000-нан астам шақырым жолға асфальт төсеу жоспарланған. Қазіргі таңда бұл жұмыстардың 97 пайызы толық аяқталды.

Қала басшысының мәлімдеуінше, биылғы жылдың соңына дейін Шымкенттегі барлық тұрғындар қоныстанған елді мекендер толықтай асфальт жолмен қамтамасыз етіледі. Сонымен қатар, мегаполистің көлік әлеуетін арттыратын ірі жобалардың құрылысы қарқынды:

• А-2 айналма жолы: Транзиттік көліктердің қала орталығына кірмей өтуі үшін бұл жол қайта құрылып жатыр.
• Қонаев даңғылының жалғасы: Қаланың басты артерияларының бірі саналатын бұл даңғыл құрылысы келесі жылы толық аяқталмақ.
• Теміржол өткелдері: Момынов көшесіндегі өткел 95 пайызға дайын және жақын арада ашылады. Ал Тіленшин көшесіндегі өткел келесі жылы пайдалануға беріледі.

Жолдардың сапасын сақтау мақсатында қалаға кіреберіс жолдарда заманауи бақылау жүйелері енгізілді. Ауыр жүк көліктерінің салмағын автоматты түрде өлшейтін жүйе қараша айынан бері 240 млн теңге айыппұл салып, заңсыз жүк тасымалын шектеуге көмектескен. Келесі жылы мұндай жүйе тағы алты бағытқа орнатылады.

Инфрақұрылымдық дамудың тағы бір маңызды бағыты — әуе көлігі. Шымкент әуежайында жаңа ұшу-қону жолағының құрылысы басталды. Бұл жоба аяқталған соң Шымкент халықаралық деңгейдегі мультимодальды хабқа айналып, жүк және жолаушылар тасымалының ірі торабына айналмақ. Бұл өзгерістердің барлығы Шымкенттің жайлылығын арттырып қана қоймай, оның транзиттік және экономикалық мүмкіндіктерін жаңа деңгейге көтереді.