Медициналық қызмет көрсету саласында 1 814, ал фармацевтикалық салада 458 мемлекеттік қызмет көрсетілді.
Қазақстан Республикасы Денсаулық сақтау министрлігінің Медициналық және фармацевтикалық бақылау комитетінің Шымкент қаласы бойынша департаменті 2026 жылдың І жартыжылдығында медициналық және фармацевтикалық қызмет сапасын қамтамасыз ету, мемлекеттік бақылауды жүзеге асыру және мемлекеттік қызметтер көрсету бағытында жоспарлы жұмыстар атқарды.
Бұл туралы Өңірлік коммуникациялар қызметі алаңында «Шымкент қаласы бойынша медициналық және фармацевтикалық бақылау саласында атқарылған жұмыстар, қол жеткізілген нәтижелер және алдағы кезеңге арналған жоспарлар туралы» тақырыбында баспасөз конференциясында айтылды.
Есепті кезеңде Департамент медициналық қызмет көрсету, фармацевтикалық қызметті лицензиялау, мамандарға сертификат беру және өзге де мемлекеттік қызметтерді жүзеге асырды. Нәтижесінде медициналық қызмет көрсету саласында 1 814, ал фармацевтикалық салада 458 мемлекеттік қызмет көрсетілді.
Сонымен қатар, азаматтар мен заңды тұлғалардың өтініштерін қарау жұмыстары тұрақты негізде жүргізілді. Алты ай ішінде Департаментке 446 өтініш келіп түсіп, олардың басым бөлігі қолданыстағы заңнама талаптарына сәйкес қаралды. Құзыретіне сәйкес 132 өтініш уәкілетті мемлекеттік органдарға жолданып, 99 өтініш бойынша түсіндірме берілді. Сондай-ақ 126 өтініш негізінде тексеру іс-шаралары ұйымдастырылды.
Өтініштердің негізгі бөлігі медициналық қызмет сапасына, дәрілік заттармен қамтамасыз ету мәселелеріне және медициналық көмекті ұйымдастыруға қатысты болды. Қаралған өтініштердің құрылымында терапевтік, хирургиялық, акушерлік-гинекологиялық, педиатриялық, стоматологиялық қызметтер және дәрілік заттар мен медициналық бұйымдардың айналымына қатысты мәселелер қамтылды.
Мемлекеттік бақылау шеңберінде 2026 жылдың І жартыжылдығында 133 жоспардан тыс тексеру жүргізілді. Оның ішінде 56 өтініш негізді, 48-і ішінара негізделген деп танылса, 29 өтініш бойынша заңнама талаптарының бұзылуы анықталған жоқ.
Департамент алдағы уақытта да медициналық және фармацевтикалық қызметтердің сапасын арттыру, заңнама талаптарының сақталуын қамтамасыз ету және азаматтарға сапалы мемлекеттік қызмет көрсету бағытындағы жұмыстарды жалғастырады.
