Ол биылғы алғашқы лекте грантқа өтінім беріп, комиссия алдында бизнес-жобасын сәтті қорғап шыққан. Нәтижесінде 400 АЕК мөлшеріндегі мемлекеттік грантқа қол жеткізген.
Шымкент қаласында халықтың әлеуметтік осал топтарын қолдау және шағын бизнесті дамыту бағытындағы мемлекеттік бағдарламалар өз жемісін беруде. Биылғы жылы арнайы құрылған комиссияның шешімімен қаланың 431 тұрғынына өз ісін бастау немесе дамыту үшін 400 АЕК-ке дейінгі мөлшерде қайтарымсыз гранттар берілді. Бұл қолдау азаматтардың тек табысын арттырып қана қоймай, қоғам үшін маңызды әлеуметтік мәселелерді шешуге де мүмкіндік беріп отыр.
Грант иегерлерінің ішінде өзінің ерекше жобасымен дараланған жандардың бірі — көп балалы ана Ақмейір Қабылбек. Ол биылғы жылдың алғашқы легінде-ақ бағын сынап, бизнес-идеясын комиссия мүшелерінің алдында сенімді қорғап шықты. Ақмейірдің жобасы тек пайда табуды емес, ерекше күтімді қажет ететін балаларға көмектесуді көздегендіктен, комиссия тарапынан жоғары бағаланып, мақұлданды.
Нәтижесінде кәсіпкер ана 400 АЕК мөлшеріндегі мемлекеттік грантқа қол жеткізді. Айта кету керек, 2025 жылғы бекітілген айлық есептік көрсеткішке сәйкес, бұл сома 1 572 800 теңгені құрайды. Бұл қаражат жас кәсіпкер үшін үлкен демеу болды.
Ақмейір Қабылбек алынған қаржыны тиімді әрі мақсатты жұмсап, ерекше балаларды түзету-дамыту орталығын ашты. Грант қаражатына орталыққа ең қажетті заманауи құрал-жабдықтар сатып алынды.
Орталықтың жұмысын жүйелі бастау үшін кәсіпкер ғимаратты өз қаражаты есебінен жалға алған. Бүгінде мұнда 5 жасқа дейінгі 20 бала тұрақты түрде көмек алуда. Орталықта білікті мамандар — логопед, АВА-терапевт, сенсорлық интеграция және АФК (бейімделген дене шынықтыру) мамандары қызмет көрсетеді. Бұл ерекше балалардың қоғамға бейімделуі мен дамуына үлкен үлес қосуда.
Грант беру талаптары: Неге басымдық беріледі?
Шымкент қалалық жұмыспен қамту және әлеуметтік қорғау басқармасы гранттарды бекіту кезінде үміткерлерге қойылатын талаптардың қатаң әрі ашық екенін атап өтті. Комиссия мүшелері шешім қабылдауда келесі факторларға басымдық береді:
- Жобаның өміршеңдігі: Кәсіптің ұзақ уақыт жұмыс істеу мүмкіндігі.
- Жұмыс орындары: Жаңа жұмыс орындарының құрылуы.
- Сұраныс: Таңдалған қызметтің немесе тауардың нарықтағы қажеттілігі.
- Тәжірибе: Үміткердің таңдаған саласы бойынша білімі мен біліктілігі.
Сондай-ақ, мемлекеттік гранттың қатаң мақсатты екенін есте сақтау маңызды. Қаражатты жеке мұқтаждықтарға, яғни үй немесе жер телімін сатып алуға, несиені өтеуге, сондай-ақ заңмен тыйым салынған немесе акциздік тауарларды өндіруге жұмсауға тыйым салынады.
Бүгінгі таңда Шымкенттегі грант алған азаматтардың басым бөлігі Ақмейір сияқты өз кәсіптерін дөңгелетіп, қала экономикасының дамуына және әлеуметтік мәселелердің шешілуіне өз үлестерін қосуда.
