ШЫМКЕНТТЕ СТУДЕНТТЕР ҮЙІ ПАЙДАЛАНУҒА БЕРІЛДІ

05.09.2024 12:38

Барлық жағдаймен қамтамасыз етілген студенттер үйінің оның тұрғындары үшін ең маңыздысы жатақхана оқу орнына жақын орналасқаны қуантты.

Жаңа оқу жылы М.Әуезов атындағы ОҚУ білім ордасында жаңа үлгідегі Студенттер үйі ашылды.

550 студентке арналған үйде әр қайсысы 2-3 студентке арналған бөлмелерден тұрады. Барлығы жайлы жиһаздармен, замануи техникалармен қамтамасыз етілген. Әр қабатта заманауи жабдықталған асхана және кір жуатын бөлмелер бар. Барлық жағдаймен қамтамасыз етілген студенттер үйінің оның тұрғындары үшін ең маңыздысы жатақхана оқу орнына жақын орналасқаны қуантты.

М.Әуезов атындағы ОҚУ-дың тәрбие ісі жөніндегі проректоры Ғани Бесбаевтың айтуынша бұл ғимарат «SUNRISE CY» ЖШС-і және М.Әуезов атындағы ОҚУ арасындағы келісімшарт негізінде салынған. Сондай-ақ, бұл студенттерге арналған үйдің ерекшелігі қонақ үй үлгісінде салынуында.

«SUNRISE CY» ЖШС-інің директоры Бексұлтан Қуанышбекұлы жобаға 1,7 млрд. теңге қаржы жұмсалғандығын атап өтті.

Студенттер үйінің ашылуына университеттің профессор-оқытушылар құрамы, зиялы қауым өкілдері және студент-жастар қатысты. Игі бастамада сөз алған ардагер Жеңісбай Сұлтанов, Шымкент қаласы ардагерлер кеңесінің төрағасы Кенжехан Төлебаев жас ұрпаққа ізгі ниетін білдіріп, жатақхананың лентасын салтанатты түрде қиды.

М. Әуезов атындағы ОҚУ-ға биыл жатақханаға орналасуға студенттерден 2 565 өтінім түскен. Университетте барлығы 8 жатақхана болса, жаңа Студенттік үй мемлекеттік-жекеменшік әріптестік аясында пайдалануға берілген төртінші нысан.

Студенттер үйі – білім алушылар үшін маңызды әлеуметтік нысан. Ол студенттерге қолайлы тұрмыс жағдайын ұсынумен қатар, олардың білім алуына, мәдени дамуына және әлеуметтік қарым-қатынастарын нығайтуға ықпал етеді. Студенттер үйі жас мамандардың өзіндік орта қалыптастыруына, жаңа достар тауып, әртүрлі іс-шараларға қатысуына мүмкіндік береді. Сонымен қатар, бұл орын жастарды дербестікке үйретіп, жауапкершілік пен тәртіпке баулиды. Осындай үйлердің болуы студенттердің өмір сүру жағдайларын жақсартып, оқу үдерісіне толыққанды көңіл бөлуге септігін тигізеді.