Шымкентте ЖРВИ, ТҰМАУ және COVID-19 эпидемиясына қарсы жаңа шаралар күшейтілді

13.09.2024 17:47

564

Егер бір сыныптағы оқушылардың 20%-дан 30%-ға дейінгі бөлігі ЖРВИ-мен ауыратын болса, кабинеттік оқыту жүйесі тоқтатылып, жаңа балаларды қабылдауға тыйым салынады.

Шымкент қаласында ЖРВИ, тұмау және COVID-19 ауруларының таралуын бақылау мақсатында жаңа шаралар қолға алынды. Қалада ұйымдасқан ұжымдарда эпидемиологиялық қауіпсіздік күшейтілді.

Бұл туралы бүгін Өңірлік коммуникациялар алаңында өткен «Тұмау мен ЖРВИ-дің алдын алу: вакцинация және дәрігерлердің ұсыныстары» тақырыбында баспасөз конференциясында Шымкент қалалық денсаулық сақтау басқармасы басшысының орынбасары Дүйсенбаева Сәуле Сансызбайқызы, Шымкент қаласының санитарлық-эпидемиологиялық бақылау Департаменті басшысының орынбасары Тұрымбетова Айгүл Мелесқызы кеңінен баяндап берді.

Барлық білім беру және жұмыс орындарында күн сайын таңертеңгі «сүзгі» өткізіледі. Бұл сүзгілер арқылы ЖРВИ, тұмау және COVID-19 белгілері бар адамдар дер кезінде анықталып, олардың таралуы алдын алынады. Сырқат белгілері бар балалар дереу оқудан немесе жұмысынан шеттетіледі, бұл эпидемиялық жағдайды бақылауда ұстауға мүмкіндік береді.

Егер бір сыныптағы оқушылардың 20%-дан 30%-ға дейінгі бөлігі ЖРВИ-мен ауыратын болса, кабинеттік оқыту жүйесі тоқтатылып, жаңа балаларды қабылдауға тыйым салынады. Егер аурушаңдық деңгейі 30%-дан жоғары болса, сынып онлайн оқыту форматына ауыстырылады.

Бұл шаралар аурулардың таралуын тиімді бақылауға бағытталған.

Қалада енгізілген шаралар тұрғындардың денсаулығын сақтау және эпидемиялық қауіпсіздікті қамтамасыз ету мақсатында жүзеге асырылып отыр.

Айта кету керек, аталған баспасөз брифингінде Шымкент қаласына Ресейдің «Петровакс Фарм» компаниясы шығарған «Гриппол Плюс» үшвалентті тұмауға қарсы вакцинасының 150 мың дозасы жеткізілгені айтылды.

2024 жылы Шымкент қаласының тұрғындарын жаппай иммундау шараларының басты мақсаты – халықтың әлсіз топтарын қорғап, тұмаудың кең таралуын болдырмау. Жергілікті билік тұрғындарды өз денсаулығына жауапкершілікпен қарап, вакцинациялау науқанына белсенді қатысуға шақырады.

Еске салсақ, аталған баспасөз конференциясында күзгі-қысқы маусымның келуімен бірге ЖРВИ (жіті респираторлық вирустық инфекциялар) және тұмаудың таралуы айтарлықтай арта түсетіндігін және бұл кезеңнің эпидемиялық маусым ретінде ерекшеленуі тұмаудың жедел жұқпалы вирустық ауру екендігіне байланысты екендігі айтылған болатын.