ЖАУЫНГЕРЛІК ТУ ШЫМКЕНТ ҚАЛАСЫНЫҢ АУМАҚТЫҚ ҚОРҒАНЫС БРИГАДАСЫНА ТАБЫСТАЛДЫ

29.09.2024 16:07

259

Салтанатты іс-шараға бөлім командирлері, Шымкент гарнизонының әскери қызметшілері, ардагерлер, сондай-ақ «Жас сарбаз» әскери-патриоттық қозғалысы мен «Алан» халықаралық мектебінің оқушылары қатысты.

Шымкент қаласында ҚР Қорғаныс министрлігінің 35748 әскери бөлімінде аумақтық қорғаныс бригадасына Жауынгерлік Туды тапсыруға арналған салтанатты іс-шара өтті.

Тапсыру рәсіміне Қорғаныс министрінің бірінші орынбасары-ҚР Қарулы Күштері Бас штабының бастығы генерал-лейтенант Сұлтан Камалетдинов, қала әкімінің орынбасары Айдын Кәрімов, бөлім командирлері, Шымкент гарнизонының әскери қызметшілері, ардагерлер, сондай-ақ «Жас сарбаз» әскери-патриоттық қозғалысы мен «Алан» халықаралық мектебінің оқушылары қатысты.

Қорғаныс министрінің бірінші орынбасары әскери қызметшілерді құттықтап, Қазақстан Республикасының Президенті — ҚР Қарулы Күштерінің Жоғарғы Бас қолбасшысы Қасым-Жомарт Тоқаевтың грамотасының мәтінін оқыды.

«Жауынгерлік ту әрбір әскери қызметшіге Отанды қорғаудың батырлық дәстүрлері мен қасиетті борышын еске салады. Жауынгерлік ту-әскери бөлімнің тарихы мен сіңірген еңбегінің, сондай-ақ оның Қазақстан Республикасының Қарулы Күштеріне тиесілілігінің куәлігі. Әскери ар-намыс пен ерліктің, даңқтың нышаны әрқашан биікте желбіресін», - деді генерал-лейтенант Сұлтан Камалетдинов.

Сонымен қатар, қала әкімінің орынбасары өзінің құттықтау сөзінде Жауынгерлік Туды тапсыру әрқашан үлкен құрмет пен мақтаныш екенін атап өтті.

Айта кету керек, жауынгерлік туды табыстау салтанатты рәсімі әскери бөлімнің мәртебесі мен абыройын айқындайтын маңызды шара болып табылады. Бұл туды тапсыру жауынгерлерге жоғары жауапкершілік жүктеп, олардың Отан алдындағы адалдығы мен ерлігінің белгісі саналады. Туды алған бөлімнің жеке құрамы өз міндеттерін абыроймен атқаруға ант беріп, әскери дәстүрлерді сақтауға, ел қауіпсіздігін қорғауға деген адалдығын білдіреді.