Жылу, көмір және бақылау: Шымкент қысты толық дайындықпен қарсы алады

Жылыту: іске қосу – кедергісіз

Қалалық қызметтердің мәліметінше, қыста 27 қазандықтың 23-і дайын. 17 сорғы станциясының 13-і тексеруден өтті, қалғандары тамыз айының соңына дейін әзірленбек. Қаланың жылу желілерінің ұзындығы шамамен 840 шақырымды құрайды. Жазғы сынақтар кезінде 98 ақаулы учаске анықталды — оның 90-ы жойылды, қалғанын 1 қыркүйекке дейін аяқтау жоспарлануда.

Жаңғырту жалғасуда

Биыл да жылумен қамту нысандарын кең көлемде жаңғырту жұмыстары жүргізілуде. Негізгі қазандықтар жаңартылды, жылу трассалары мен сорғы станциялары қайта құрудан өтуде.

«Бастысы — қысты апатсыз өткізу ғана емес, жүйені ұзақ мерзімге сенімді ету. Біз барлық учаскелерде бақылауды күшейттік, бұл істен шығулардың алдын алып, шымкенттіктердің үйлеріне тұрақты жылу жеткізуге мүмкіндік береді», — деді «Қуатжылуорталық» ШЖҚ МКК-нің бас инженері Айбек Қожабеков.

Коммуналдық қызмет өкілдерінің айтуынша, төтенше жағдай болған кезде жедел әрекет ету қарастырылған: ақауларды қысқа мерзімде жоюға дайын мобильді жөндеу бригадалары құрылды.

Тұрғын үйлер мен әлеуметтік нысандар

Тұрғын үй қоры жоспарға сәйкес дайындалуда: екі мыңнан астам көпқабатты үйдің шамамен 70%-ы әзір.

Әлеуметтік саладағы нысандардың дайындығы жақсы: барлық мектептер мен мәдениет орталықтары — 100%, ауруханалар — 95%.