Биылғы футболдан әлем чемпионаты АҚШ, Мексика және Канадада өтеді.
Фото: UEFA.com
ERNUR.KZ. Италия футбол федерациясының (FIGC) президенті Габриэле Гравина Италия құрамасы қатарынан үшінші әлем чемпионатына жолдама ала алмағаннан кейін қызметінен кетті, деп жазады inform.kz.
Жаңа FIGC басшысы 22 маусымда тағайындалады. Бұл шешім ұлттық құраманың сәтсіздігі мен саяси қысымға байланысты қабылданды. Сондай-ақ бұл жағдай бас бапкер Дженнаро Гаттузоның қызметінен кетуіне және италиялық футболда ауқымды реформалардың басталуына түрткі болуы мүмкін.
FIGC президенті Габриэле Гравина әлем чемпионатының іріктеу матчтарындағы ұлттық құраманың бірқатар сәтсіз ойындарынан кейін өз қызметін босатты. Соңғы шешуші соққы Босния және Герцеговина құрамасынан пенальти сериясында жеңілу болды. Осылайша Италия әлем чемпионатына қатарынан үшінші рет қатыса алмай қалды.
Италияның спорт министрі Андреа Абоди федерация басшылығын ауыстыруды талап етіп, ел футболына түбегейлі реформа қажет екенін атап өтті.
Италия құрамасының әлем чемпионаттарындағы сәтсіздіктер тарихы 2010 және 2014 жылдардан бастау алады. Ол кезде команда топтық кезеңнен аса алмаған еді. Ал соңғы табысты плей-офф 2006 жылы өтті. Сол жылы Италия Францияны пенальти сериясында жеңіп, әлем чемпионы атанған еді.
Айта кетейік, жаңа FIGC басшысы 22 маусымда тағайындалады. Оның алдында ұлттық құраманы қайта жандандыру, 2032 жылғы Еуропа чемпионатына дейін стадион инфрақұрылымын жақсарту және халықаралық аренадағы италиялық футболдың беделін қалпына келтіру міндеті тұр.
Бұған дейін FIFA 2026 жылғы футболдан әлем чемпионатының финалына рекордтық бағалар белгілегені, ең қымбат билеттердің құны 10 990 долларға жеткен болатын.
Еске сала кетейік, биылғы футболдан әлем чемпионаты АҚШ, Мексика және Канадада өтеді.
АҚШ Ішкі қауіпсіздік министрлігінің басшылығы футболдан әлем чемпионаты кезінде қауіпсіздікке төнуі мүмкін қатерлер жөнінде ескерту жасады.
Ал Мексика президенті әлем чемпионатының ашылу матчына алған билетін сыйға тартты.
