Теренс Кроуфорд Канело Альваресті жеңіп, үш салмақта абсолютті чемпион атанды

Фото: DAZN
ERNUR.KZ. Лас-Вегаста онжылдықтың ең көп күтілген жекпе-жектерінің бірі өтті – америкалық Теренс Кроуфорд екінші орта салмақтағы (76,2 кг дейін) абсолютті чемпион атағы үшін мексикалық супержұлдыз Сауль "Канело" Альвареспен кездесті, деп жазады Stan.kz

Кездесу толық 12 раундқа созылып, төрешілердің бірауыздан шешімімен аяқталды. Үшеуінің де бағамы Кроуфордтың пайдасына болды: 116–112, 115–113 және 115–113. Бұл жеңіс америкалыққа өз рекордын сақтап қалуға мүмкіндік берді (42 жеңіс, 0 жеңіліс) әрі тарихқа үш салмақта абсолютті чемпион атанған алғашқы боксшы ретінде енді.

Кроуфорд жекпе-жек бойы дәлдігімен және сабырлығымен көзге түсіп, Канелоның шабуылдық стилін тиімді түрде бейтараптандырды. Альварес бірнеше қауіпті соққылар сериясын жасай алғанымен, көп жағдайда жылдамдық пен тактикалық тұрғыда қарсыласынан қалып қойды.

Бұл жеңіліс Канелоның мансабындағы үшінші сәтсіздігі болды. 60-тан аса жеңіс пен 39 нокаутына қарамастан, ол айқастан кейін жанкүйерлеріне қайта оралып, әлі де бокстың шыңында өнер көрсетуге дайын екенін жеткізді.

Айта кетейік, Канело бұған дейін қазақстандық Геннадий Головкинмен үш мәрте жұдырықтасқан. Алғашқы жекпе-жек (2017) тең нәтижемен аяқталды – 113:115, 114:114, 118:110. Екінші кездесуінде (2018) Альварес төрешілердің бөлінген шешімімен жеңді – 115:113, 115:113, 114:114. Үшінші айқаста (2022) Канело бірауызды шешіммен жеңіске жетті – 116:112, 115:113, 115:113.

Осылайша Кроуфордтың бұл триумфы оны қазіргі заманның ең ұлы боксшыларының біріне айналдырды. Көптеген сарапшылар оның Канелоны жеңуін 2025 жылғы басты оқиға және бүкіл спорт үшін тарихи сәт деп бағалап отыр