Әлемдік ҒЫЛЫМҒА өз үлесін қосып жүрген ҚАЗАҚ ҚЫЗЫ

көрнекілік үшін сурет: pinterest.com

Бүгінгі студенттер үшін ғылым жолына түскен жастардың табысты тарихы ерекше шабыт береді. Сондай тұлғалардың бірі – Ақтөбеден шыққан 26 жастағы жас ғалым, Бану Әбдіқадірова. Ол қазіргі таңда АҚШ-тағы UMASS университетінде докторантурада білім алып жатыр. Ең қызығы – Бану Назарбаев Университетінің бакалаврын аяқтаған соң, магистратурасыз бірден докторантураға түскен. Бұл – сирек кездесетін әрі үлкен еңбекті талап ететін жетістік.

Банудың зерттеулері адамзат үшін аса маңызды салаға бағытталған. Ол инсульт алған немесе жүйке-бұлшықет ауруына шалдыққан адамдарға көмектесетін жаңа технологияларды дамытып жүр. Алдағы уақытта оның еңбектері нейрореабилитация, жасанды аяқ-қол, ақылды жүгіру жолдары сияқты салаларда қолданысқа енуі мүмкін. Бұл робототехника, биомедициналық инженерия мен механиканы қамтитын күрделі бағыт. Көпшілігі мұндай саланы ер адамдарға тән деп ойласа да, Бану өзінің еңбегімен қыз баласының ғылымда да көшбасшы бола алатынын дәлелдеп жүр.

– Бану, сіздің ғылымға қызығушылығыңыз қалай басталды?
– Бала кезімде-ақ биология мен физикаға ерекше қызығатынмын. Назарбаев Университетінде оқып жүргенде зертханалық жұмыстарға қатысып, нақты ғылымның адам өмірін өзгерте алатынын түсіндім. Сол сәттен бастап бұл жолды таңдадым.

– Магистратурасыз тікелей докторантураға түсу оңай болмаған шығар?
– Әрине, оңай болған жоқ. Бірақ көп еңбектеніп, ғылыми мақалалар жазып, тәжірибелеріммен бөлістім. Ең бастысы – сенім мен табандылық. Кейде өзіңе сенбесең, ешкім де сенбейді.

– Зерттеу жұмысыңыздың нәтижелері қайда қолданылады деп ойлайсыз?
– Болашақта менің жобаларым науқастардың күнделікті өмірін жеңілдетуге бағытталады. Мысалы, ақылды жүгіру жолы инсульт алған адамдарға қайта жүруді үйретуі мүмкін. Ал жасанды аяқ-қолдар бұрынғыдан да ыңғайлы әрі қолжетімді болады.

– Студент жастарға қандай кеңес берер едіңіз?
– Ең бастысы – қорықпау. Арманды үлкен қою керек, бірақ оған жету үшін күн сайын кішкентай қадамдар жасай білу маңызды. Қазірден бастап уақытты тиімді пайдаланып, тек сабаққа ғана емес, тәжірибеге де мән беріңіздер.

Бану тек ғылымға ғана берілген жан емес. Оның күйеуі Жанарыс та АҚШ-та магистрлік білім алып, Computer Science мамандығын меңгерді. Ғылымдағы ізденісті екеуі бірге жалғастырып келеді. Бос уақыттарында тау шыңына шығып, жартасқа өрмелеуді, табиғат аясында уақыт өткізуді қатты ұнатады. Бұл олардың еңбекқор әрі жан-жақты екенін көрсетеді.

Бану Әбдіқадірова – қазақ жастарына үлкен үлгі. Ол білім мен еңбектің арқасында биік белестерді бағындыруға болатынын дәлелдеді. Ғылымға құштарлық пен табандылық болса, кез келген арман орындалады. Оның өмірлік ұстанымы – “Өзіңді дамытсаң, қоғам да дамиды”.

Студенттер үшін Банудың жолы – нағыз мотивация. Өйткені ол бізге: "Еңбек ет, ізден, қорықпа – сонда мүмкін емес ештеңе жоқ" дегенді көрсетіп отыр.