Достық, махаббат, қарым-қатынас: СТУДЕНТТІК өмірдің ПСИХОЛОГИЯСЫ

Осы мақаланы оқып отырған сен – студентсің. Иә, иә, сені білем: таңертең сабаққа кешігіп, кешке жатақханада досыңмен шай ішіп, біреуді ұнатып жүрген, сессияға жақындағанда “өмірдің мәні не өзі?” деп философияға кетіп қалатын студентсің.

Бүгін айтатын әңгімеміз – нағыз сенің өмірің туралы. Достар, махаббат, қарым-қатынас... бәрі бастан өткен, өтіп жатқан, әлі де талай өтетін дүниелер. Бірақ кейде осының бәрі шатасып, ішкі жан дүниені шаршататын сияқты, иә? Ендеше, бірге сөйлесейік.

Достар туралы – бәрі өзіміз ойлағандай емес

Студент болған соң, айналаңа лезде адамдар толып кетеді. Сабақтағы топтастар, жатақхана көршілері, волонтерлік клубтағы таныстар, кейде асханада бірге кезек күтіп тұрған біреу – бәрі дос болып кететін сияқты.

Бірақ уақыт өте келе түсінесің: барлық таныс – дос емес. Шынайы дос – сенімен үндемей отырып та ыңғайлы болатын адам. Ұрысқанда, ашуланса да, сенің қасыңда қала беретін адам.

Ескер:

• “Сен менен алыстап кеттің” деген адам көбіне өзі байланыс ұстамайды
• Әр ортада бөлекше болу – екіжүзділік емес, бейімделе білу
• Сенің табысыңа шын қуана алатын дос – сирек кездесетін байлық

Бір сөзбен айтқанда: көбімен аралас, бірақ санаулы адамға ғана шын сырынды айт.

Махаббат жайлы – “мен сені сүйем” деп айтсаң, бәрі шешілмейді

Студент кезде махаббат – бөлек бір әлем. Біреу жатақхананың кіреберісінде қызды күтеді, біреу сабақта көз алмай қарап отырады, ал біреу үшін “ол маған қарап күлді ме, жоқ па?” деген сұрақпен күні бойы миын жейді.

Бірақ бір нәрсені түсінейік:
Махаббат – тек сезім емес, ол жауапкершілік.
Екі адамның “сүйем” деп айтқаны – ертегінің басы ғана. Бұдан кейін түсініспеушілік, қызғаныш, реніш, бірге өсу, бірге сабыр ету деген тараулар басталады.

Кішкентай кеңестер:

• Өзіңді жоғалтпа. Сен – өзіңе дейін де, өзіңнен кейін де құндысың
• Қарым-қатынас – жарыс емес. “Ол мені қаншалықты сүйеді?” деп санама
• Махаббатта еркелік болады, бірақ ол шектен шықпасын

Бірінші курстағы сезім екінші курста ертегіге айналуы мүмкін. Бірақ ол ертегі саған өмірлік сабақ қалдырады.

Қарым-қатынас: бір сөз бәрін бұзуы, бір сөз бәрін жөндеуі мүмкін

Адам – әлеуметтік жаратылыс. Кіммен аралассаң, сондай боласың. Бірақ бәрімен жақсы қарым-қатынас орнату – оңай шаруа емес.

Топта біреу үнемі ұрсып сөйлейді, бірі сені түсінбейді, бірімен тіпті сөйлескің келмейді... Сондай сәттерде "ойбай, маған тыныш өз әлемімде жүрген ұнайды" деп интроверт боп кеткіміз келеді. Бірақ өмір – адамдармен қарым-қатынас арқылы ғана алға жылжиды.

Қарапайым, бірақ маңызды:

• Ренжіп қалсаң, үндемей кетпе. Ашық айт – бірақ тыныш үнмен
• Әрқашан өз пікіріңді жеткіз, бірақ өзгелерді де тыңда
• "Жоқ" деп айту – мәдениет. Үйрен. Бос уәде – бос байланыс.

Ал ең маңызды қарым-қатынас – өзіңмен...

Көп адам достарға, ғашығына, таныстарына ұнаймын деп жанталасады. Бірақ өзі өзіне ұнамай тұрады. Сыртың жылтырап тұр, ішің – мазасыз. Басыңда уайым, жүрегіңде тыныштық жоқ.

Міне, осы кезде өзіңе "мен не үшін бұлай жасап жүрмін?", "мен кіммін?", "маған не керек?" деген сұрақ қоюың керек. Себебі өзіңді түсінбей, өзгеге де дұрыс көзқараспен қарау қиын.

Өзіңмен байланыс орнатудың жолы:

• Жалғыз қалудан қорықпа. Сол кезде ішіңмен сөйлесесің
• Өткенің үшін өзіңді кінәлама – бәрі тәжірибе
• Қатты шаршасаң – демал. Сен робот емессің

Студенттік өмір – шынайылықты үйрететін кезең!

Кейде бәрі керемет болып көрінеді – достар күліп жүр, сүйіктіңмен қыдырып келдің, көңіл-күй күшті. Ал кейде – бәрі қап-қара: жалғызсың, ешкімге керек емессің сияқты. Бұл – өмірдің бір бөлігі.

Бірақ ұмытпа:
Достық та, махаббат та, қарым-қатынас та – бәрі өзгермелі. Ал сен – тұрақтысың.
Өзіңді жоғалтпа. Өз жүрегіңе адал бол. Қай жерде болмасын, шынайы бол.

Ж.Кәрімхан.