СТУДЕНТТЕРГЕ АРНАЛҒАН: жазда ТАБЫС ТАБУДЫҢ тиімді жолдары

сурет: journal.zarplata.ru сайтынан

Жаз – студенттер үшін демалыс ғана емес, өз-өзіңді дамытып, қаржы жағынан тәуелсіз болуға қадам жасайтын керемет кезең. Бұл уақытта бос отырғанша, қосымша табыс тауып, тәжірибе жинап, жаңа дағдыларды үйреніп алған пайдалы. Себебі оқу жылы басталғанда уақыт азаяды, ал жазда мүмкіндіктер көп.

Қазір табыс табудың тәсілдері өте көп. Қалада болсын, ауылда болсын немесе үйде отырып-ақ, ақша табуға болады. Төменде студентке лайық ең тиімді онлайн және офлайн табыс көздерін ұсынамыз.

ОНЛАЙН ТАБЫС КӨЗДЕРІ

1. Фриланс арқылы табыс табу

Интернетте түрлі қызметтерге сұраныс жоғары. Саған келесі салалар қызық болса, фриланс платформаларында тіркеліп, жұмыс істеуге болады:

• Мәтін жазу (копирайтинг, рерайтинг)
• Дизайн жасау (Canva, Photoshop)
• Видео монтаж (CapCut, Premiere Pro)
• SMM жүргізу (Instagram, TikTok)
• Онлайн аударма
• Реферат, курстық жазу

Платформалар: Kwork.kz, Freelancer.kz, Work-zilla.com, FL.ru, Upwork.com, Fiverr.com

2. Онлайн сабақ беру

Өз пәніңді жақсы білсең – оқушыларға онлайн репетитор бол.
Мысалы:

• Математика, физика, химия
• Ағылшын, орыс, қазақ тілі
• ҰБТ, емтиханға дайындық

Платформалар: Flip.kz , OLX, Instagram, Telegram чаттар арқылы жеке оқушы табуға болады

3. Контент жасап ақша табу

• TikTok, Instagram, YouTube Shorts форматтарында білім, мотивация, күлкілі, пайдалы кеңестер туралы видеолар түсірсең, монетизация қосып табыс табуға болады.
• TikTok-та 10 000+ жазылушысы бар студенттер 50–200 мың теңгеге дейін жарнама алып жүр.
• YouTube-та 1000+ жазылушы, 4000 сағат қаралым болса – ақша түсе бастайды.

ОФЛАЙН ТАБЫС КӨЗДЕРІ

1. Жазғы лагерьге тәрбиеші/аниматор болып кіру

Көптеген мектеп жанындағы лагерьлер мен жеке лагерьлер жазда студенттерді жұмысқа алады.
Артықшылығы: тегін жатақ, тамақ, таза ауа, көңілді орта және жалақы.
Орташа табыс: 80 000 – 150 000 тг

2. Сатушы/кассир болып жұмыс істеу

Супермаркет, киім дүкені, кафе секілді орындарда жазда қосымша қызметкерлер керек болады.
Керек: жауапкершілік, қарапайым қарым-қатынас, тез үйрену.
Табыс: айына 100 000 – 200 000 тг

3. Бала қарау / репетитор болу

Ата-аналар жазда жұмысқа кетеді, ал балалары демалыста. Сол себепті студенттерге бала бағуға, серуендетуге, ойын үйретуге жиі сенім артады.
Табыс: күніне 5000–10 000 теңге, кейде сағаттық есеппен.

4. Жеткізу қызметі (курьер)

Егер сенде велосипед, самокат не көлік болса – Glovo, Wolt, Yandex Delivery секілді сервистерге қосылып, тапсырыс жеткізу арқылы ақша табуға болады.
Артықшылығы: уақытың өзіңде, қалаған сәтте жұмыс істеуге болады.
Табыс: күніне 5–20 мың тг аралығы.

Жазда демалумен қатар, аз да болса табыс тауып, өз қажеттіліктеріңді өзің жаба білу – үлкен жетістік. Бұл сенің ертеңгі еңбек нарығына бейімделуіңе, өзіңе сенімді болуға жол ашады. Ең бастысы – еңбек етуден ұялма, жаңа нәрседен қорықпа, кішіден бастауға намыстанба.

Бүгінгі жасаған әрекетің – ертеңгі мықты болашағыңның іргетасы!