Өмірін 5 млн. теңгеге бағалаған: Түркістандық шенеунік танымал журналисті ӨЛТІРУГЕ ТАПСЫРЫС БЕРГЕН

иллюстрациялық фото: ашық дереккөзден

Түркістан облысының полицейлері адам өлтіруге оқталу қылмысын ашты, деп хабарлайды ERNUR.KZ.

Естеріңізге сала кетейік, 3 қаңтар күні әлеуметтік желілер мен БАҚ-та Сарыағаш ауданындағы белгілі журналистің үйіне шабуыл жасалып, оның баласы жарақат алғаны туралы ақпарат тараған болатын. Сол күні полиция қызметкерлері бұл жайтты аудандық полиция бөлімінде тіркеп, ҚР ҚК 24-99-баптары "адам өлтіруге оқталу" бойынша сотқа дейінгі тергеуді бастаған. Бұл туралы бүгін брифингте Түркістан облысы ПД бастығы полиция генерал-майоры Қайрат Дәлбеков егжей-тегжейлі айтып берді.

«Жасалған қылмыс туралы ақпаратты алған соң, бірден Сарыағаш ауданындағы қылмыс орнына менің жедел қызмет жөніндегі орынбасарым Құрманбек Сахов бастаған криминалдық полицияның кәсіби қызметкерлері мен тергеушілер тобы жіберілді. Олар барған бойда белгісіз біреулердің журналистің үйіне автокөлікпен барып, терезеден оқ атып, қашып кеткендерін анықтады. Нәтижесінде үй иесінің ұлы жарақат алған. Қылмысты ашуда біз бірқатар нұсқаларды негізге алдық. Оның бірі журналистің кәсіби қызметіне байланысты осы қылмыстың жасалуы мүмкін екені. Кейіннен дәл осы нұсқамыз расталды. Бұл қылмысты ізін суытпай ашуда оқиға орын алған уақытта куәләрдің болмауы да өзіндік қиындық туғызды.

Десе де жедел-іздестіру іс-шараларын жүргізу барысында осы оқиғаға қатысы бар Шымкент қаласының екі жас тұрғыны тұрғылықты жері бойынша ұсталды. Олар оқ атып, оқиға орнынан қашып кеткен. Содан кейін полиция қызметкерлері делдалдар мен қылмысты тапсырыс берушілерге шықты. Бүгінгі таңда біз осы қылмысқа қатысы бар 5 күдіктіні ұстадық. Заттай айғақ ретінде олардан ВАЗ (2107/21110) маркалы 2 автокөлік тәркіленді. Қылмысты орындаушылар бұл автокөліктерді қылмысты жасағандары үшін алған ақшаға сатып алған. Сондай-ақ, олардан 16 калибрлі патрондар алынды. Қазіргі уақытта Сарыағаш ауданы тұрғындарының бірі, яғни шенеуніктің осы қылмысқа тапсырыс бергені анықталды. Ол журналистің өмірін 5 000 000 теңгеге бағалаған», - деді департамент бастығы Қайрат Дәлбеков.

Полиция бастығының айтуынша, қылмысты орындаушылар іздерін жасыру мақсатында Сарыағаш ауданынан Шардараға, содан соң Арыс арқылы Шымкентке жеткен. Қазір тергеу тобы тиісті тергеу амалдарын жүргізіліп, қылмыстық іс аясында қажетті процессуалдық әрекеттер іске асырылып жатыр екен. Сотқа дейінгі тергеу барысында қылмыстың себептері мен барлық мән-жайлары анықталатын болады. Сот оларды қамауға алуға санкция беріп, күдіктілер уақытша ұстау изоляторына қамалды.