Алқаптардың нақты жағдайымен танысып, дайындық деңгейін бағамдады.
Түркістан облысы әкімінің орынбасары Нұрбол Тұрашбеков Келес ауданына арнайы іссапарымен келіп, зиянкестерге қарсы жұмысты үйлестіру штабының кеңейтілген мәжілісін өткізді, деп хабарлайды ERNUR.KZ.
Өңірдегі фитосанитарлық тұрақтылықты қамтамасыз ету мәселелерін талқылауға Келес ауданының әкімі Жәнібек Ағыбаев, сектор, мобильді топ жетекшілері мен болжам орталығының жауаптылары қатысты.
Жиын барысында 2026 жылы аудан аумағында үйірлі шегірткелерге қарсы жүргізілетін химиялық өңдеу және алдын алу іс-шараларының кешенді жоспары жан-жақты талқыланды. Келес ауданы әкімінің орынбасары Сүлеймен Жылқыбаев, Сарыағаш ауданы әкімінің орынбасары Нұрболат Талипов дайындық барысын баяндап, нақты жоспарлар мен ұйымдастыру жұмыстарына тоқталды.
Мамандардың мәліметінше, алдағы кезеңде Келесте жалпы көлемі 143 350 гектар жерді зиянкестерден қорғау үшін химиялық өңдеу жұмыстары жүргізіледі. Жалпы аумақ 19 секторға бөлініп, жұмыстарды үйлестіруге ҚР Ауыл шаруашылығы министрлігіне қарасты мекемелердің 19 маманы және жергілікті атқарушы органнан 38 өкіл жауапты болып бекітілген.
Бұл мақсатта 220 анықтаушы маманнан құралған топ пен 44 арнайы автокөлік жұмылдырылып, далалық жұмыстарды ұйымдастыру үшін 23 жатын орын қарастырылған. Кестеге сәйкес, ең ауқымды өңдеу жұмыстары Бірлік ауылдық округіндегі 44 мың 100 гектар, Жамбыл ауылдық округіндегі 44 мың 100 гектар және Бозай ауылдық округіндегі 39 мың 600 гектар алқапта атқарылмақ. Сонымен қатар, жиын барысында Қошқарата, Біртілек, Ошақты және Ақтөбе ауылдық округтеріндегі фитосанитарлық жағдайға да ерекше назар аударылды.
Сарыағашта химиялық өңдеуді 10 ауыл округте жүргізу жоспарланған. 88 600 гектарды қамту көзделіп отыр. Жалпы ауданда өңделетін аймақ 18 секторға бөлінген. Аудан әкімінің орынбасары бекітілген аймақтарға техника бөлінісі мен анықтаушылар туралы мәлімет ұсынды.
Жиыннан кейін жұмыс тобы Ақтөбе және Жүзімдік ауылдық округтеріне барып, алқаптардың нақты жағдайымен танысып, дайындық деңгейін бағамдады.
Аталған шаралар ауыл шаруашылығы өнімділігін сақтау мен экономикалық тұрақтылықты қамтамасыз етуде стратегиялық маңызға ие. Нұрбол Тұрашбеков жауапты сала басшыларына техникалық жабдықтау мен дәрілеу жұмыстарын уақытылы әрі сапалы орындауды, сондай-ақ су көздерімен туындауы ықтимал проблемалардың алдын алып, дайындықты күшейтуді тапсырды.
