Түркістанда сарбаздар Отан алдында әскери ант берді

Түркістанда сарбаздар Отан алдында әскери ант берді, деп хабарлайды ERNUR.KZ.

Ұлттық ұланның Түркістан қаласында орналасқан 5574 әскери бөлімінде өткен әскери ант қабылдау рәсімі ерекше әрі есте қаларлық сәттерге толы болды. Салтанатты шара барысында 100-ге жуық жас сарбаз Отан алдындағы қасиетті борышына адал болуға ант берді.

Рәсімге сарбаздардың 250-ден аса ата-анасы мен жақындары арнайы келіп, ұлдарының алғашқы әскери қадамына куә болды. Бұл өз кезегінде жас жауынгерлерге рухани қолдау көрсетіп, салтанатты шараның маңызын арттыра түсті.

Рәсімнің ең әсерлі сәттерінің бірі — қатардағы сарбаз Дамир Нұрланұлының көпшіліктің алдында сүйіктісіне сөз салуы болды. Бұл ерекше оқиға жиналған қауымға зор эмоция сыйлап, елге қызмет ету мен адамдық сезімнің бір-бірімен үйлесім тапқанын көрсетті.

Салтанатты іс-шара барысында әскери бөлім командирі, полковник Төлеген Шыныбеков жас сарбаздарды әскери ант қабылдауымен құттықтап, оларға жүрекжарды тілегін білдірді.

«Бүгін сіздер Отан алдындағы азаматтық әрі әскери жауапкершілікті саналы түрде қабылдап отырсыздар. Әскери ант – ерлікке, тәртіпке және елге адал қызмет етуге берілген серт. Сіздерге зор денсаулық, қажымас қайрат, темірдей тәртіп пен жауынгерлік рух тілеймін. Әрдайым ел сенімін ақтап, Ұлттық ұланның абыройын асқақтата беріңіздер!» – деді бөлім командирі.

Осы күннен бастап жас әскерилер Түркістан қаласының көшелері мен маңызды қоғамдық іс-шаралар кезінде жауынгерлік қызмет атқаруға кіріседі. Олар қоғамдық тәртіп пен азаматтардың қауіпсіздігін қамтамасыз ету жолында міндет атқармақ.