Жалпы аумағы 4267,99 шаршы метрді құрайды.
Төлебидегі Көксәйек ауылында жаңа спорт кешені пайдалануға берілді, деп хабарлайды ERNUR.KZ.
Түркістан облысында спорт инфрақұрылымын дамыту бағытындағы жұмыстар жүйелі түрде жалғасуда. Соның айқын дәлелі ретінде Төлеби ауданына қарасты Көксәйек ауылдық округінің орталығы – Көксәйек елді мекенінде жаңа заманауи спорт кешені пайдалануға берілді.
Аталған нысан «Ауыл – Ел бесігі» мемлекеттік бағдарламасы аясында республикалық бюджет есебінен салынған. Жобалаушы мекеме – «Архстрой-2005» ЖШС болса, құрылыс жұмыстарын «Корпорация Алем – құрылыс» ЖШС жүргізді.
Жалпы аумағы 4267,99 шаршы метрді құрайды. Спорт нысаны бір мезетте 100 көрерменге арналған. Мұнда баскетбол, волейбол, күрес залдары мен заманауи тренажер залы қарастырылған.
Салтанатты ашылу рәсіміне Төлеби ауданының әкімі Еркеғали Әлімқұлов пен облыстық дене шынықтыру және спорт басқармасының басшысы Ғалымжан Худияров қатысып, тұрғындарды жаңа нысанның іске қосылуымен құттықтады.
Енді спорт кешені Түркістан облыстық №7 олимпиада резервінің мамандандырылған балалар-жасөспірімдер спорт мектебінің қарауына беріліп, жас спортшыларды даярлау орталығына айналмақ.
Жалпы өңірде спорт саласын дамыту бағытында нақты нәтижелер бар. Өткен жылы 63,6 млрд теңгеге 102 спорт нысанының құрылысы аяқталған. Ал 2026 жылы 11,3 млрд теңгеге тағы 20 спорт нысанын пайдалануға беру жоспарланып отыр. Сонымен қатар 15 спорт нысанына күрделі жөндеу жүргізіліп, 15 спорт мектебі заманауи құрал-жабдықтармен қамтамасыз етілген.
Спортшыларды қолдау шаралары да күшейтілуде. Қазіргі таңда 231 спортшыға ай сайын стипендия тағайындалып, олардың жоғары нәтижелерге қол жеткізуіне барлық жағдай жасалған.
Айта кетейік, жыл соңына дейін Төлеби ауданындағы Момынай ауылында тағы бір спорт кешенін ел игілігіне беру жоспарланып отыр. Бұл жобалар ауыл тұрғындарының спортпен жүйелі айналысуына жол ашып, өскелең ұрпақтың денсаулығын нығайтуға және бос уақытын тиімді ұйымдастыруға серпін береді.
