​Ұстаздар мәртебесін көтеру - ортақ міндетіміз

Бүгін Жетісай ауданында Ұстаздар күні мерекесі салтанатты түрде аталып өтті. Шараға аудан әкімі Ж. Бейсенбаев, аудандық мәслихат хатшысы Ә. Утанов, аудан әкімінің орынбасарлары мен сала басшылары және БАҚ өкілдері қатысты, деп хабарлайды ERNUR.KZ аудан әкімдігінің баспасөз қызметіне сілтеме жасап.

Жиында сөз алған Жетісай ауданының әкімі Жамантай Бейсенбаев ұздастар қауымын төл мерекелерімен құттықтап, Алғыс хат табыс етті.
«Құрметті ұстаздар, қадірменді білім беру саласының ардагерлері! Сіздерді төл мерекелеріңізбен шын жүректен құттықтаймын! Бүгінгі қоғамда білімді ұрпақ тәрбиелеу ең маңызды миссиялардың бірі. Өйткені, зерек те, зейінді, білімге бейілді ұрпақ мемлекеттің болашақ капиталы саналады. Ұрпақ тәрбиесі жолында қызмет етіп келе жатқан мұғалімдердің ата-анадан кейінгі атқарар рөлі де ерекше. Тәуелсіз мемлекетіміздің басты құндылығы - білімді ұрпақ екені даусыз. Елбасы Нұрсұлтан Әбішұлы Назарбаевтың көреген саясатының арқасында ауданымыздағы білім ұялары яғни мектептеріміз, қазіргі күнгі талаптарға сай жабдықталып, ерекше жетістіктерге жетіп отыр. Аудан бюджетінің 60 пайызы осы білім саласына бағытталуда», - деді Жамантай Қанайұлы.