Соққы жасауға Кипр туы астында Ормуз бұғазы арқылы өтіп бара жатқан контейнер тасымалдаушы кемеге жасалған шабуыл себеп болған.
фото: REUTERS
ERNUR.KZ. Иранның Ислам революциясы сақшылар корпусы АҚШ аймақтағы істерге араласуын тоқтатқанға дейін Ормуз бұғазын толық жабатынын мәлімдеді. Осы жағдай аясында америкалық әскерилер бір апта ішінде үшінші рет Иранға соққы жасай бастады, деп жазады stan.kz.
АҚШ Орталық қолбасшылығының мәліметінше, соққы жасауға Кипр туы астында Ормуз бұғазы арқылы өтіп бара жатқан контейнер тасымалдаушы кемеге жасалған шабуыл себеп болған. Вашингтонның мәлімдеуінше, шабуылдан кейін кемеде өрт шыққан, машина бөлімі қатты зақымданып, экипаждың бір мүшесі із-түзсіз жоғалған.
Тегеранда бұл жағдайды басқаша түсіндіреді.
“Кеме "заңсыз бағытпен" жүрген, транспондерін өшірген және теңіз қатынасына қауіп төндірген. Ол ескерту ретінде оқ атылғаннан кейін тоқтаған”, – делінген мәлімдемеде.
Көп ұзамай АҚШ Иранның Ормуз бұғазындағы коммерциялық кемелер мен азаматтық кеме қатынасына шабуыл жасау мүмкіндігін шектеу үшін бірқатар соққы жасай бастады.
"Иран қателік жасады. Енді олар бұл әрекеті үшін жауап береді", – деп жазды АҚШ қорғаныс министрі Пит Хегсет X әлеуметтік желісінде.
Press TV телеарнасының мәліметінше, Тегеран бұған жауап ретінде Таяу Шығыстағы америкалық нысандарға шабуыл жасаған.
