18 сәуірден бастап республикада карантин талаптары күшейтілді.
ERNUR.KZ. Өзбекстанда бес ай бұрын жабылған ковид-орталықтар қайтадан ашыла бастады. Елде Covid-19 жұқтырған науқастар көбейді, деп жазады centralasian.org.
Өзбекстанда университеттердің дені студенттер арасында COVID-19 тарауына байланысты қашықтан оқуға көшті.
18 сәуірден бастап республикада карантин талаптары күшейтілді. Енді үйлену тойлары мен ауызашарға жүзден артық қонақ шақыруға болмайды.
Мейрамханалар мен кафелер жартылай ғана толуы тиіс. Қоғамдық көліктерге де сондай талап қойылды.
Санитария және эпидемиология қызметіндегі дереккөздің мәліметі бойынша, бес ай бұрын жабылған ковид-орталықтар коронавирус жұқтырған науқастардың көбеюіне байланысты қайтадан ашылып жатыр.
"Науқастар көбейді. Жағдай бақылаудан шығып кетті. 14 аймақта сovid-орталықтар қайтадан ашылды. Мұндай мекемелерді қаржыландыру басталды. Ол үшін Жапониядан алған несие пайдаланылады", - деді шенеуніктердің бірі.
19 сәуірде елдегі бірқатар облыста денсаулық сақтау басқармалары ковид-орталықтардың қайтадан ашылғанын растады. Атап айтқанда, Наурыз мерекесінен соң Әндіжан облыстық жұқпалы аурулар ауруханасындағы ковид-орталық қайтадан жұмыс істей бастаған.
19 сәуірдегі мәлімет бойынша, елде 86 892 адам коронавирус жұқтырған. 2037 адам емделіп жүр, 238 науқастың жағдайы ауыр, 109 науқастың халі мүшкіл.
