Ресейлік компания Ақтау маңындағы Embraer AZAL апаты үшін өтемақы төледі

Фото: ТЖМ

ERNUR.KZ. "АльфаСтрахование" сақтандыру компаниясы Ақтау маңында апатқа ұшыраған AZAL әуе компаниясының Embraer 190 ұшағы үшін авиа-каско бойынша өтемақыны толық төледі, деп жазады stan.kz.

Компанияның авиациялық және ғарыштық сақтандыру жөніндегі бас директорының орынбасары Илья Кабачник жолаушыларға өтемақы төлеу басталғанын айтты.

"Ұшаққа төлем толық көлемде ақпанда жасалған. Тәуекелдің негізгі бөлігі Ресейдің Ұлттық қайта сақтандыру компаниясында қайта сақтандырылған", – деді Илья Кабачник.

Өтемақы мөлшері жарияланбады, бірақ сарапшылардың бағалауы бойынша шамамен 25-30 миллион доллар (14 993 400 000 теңге) болады.

Кабачниктің айтуынша, жолаушыларға сақтандыру төлемдері қаңтар айында басталған. Бұл төлемдер 1999 жылғы Монреаль конвенциясымен және Ресейдің міндетті сақтандыру туралы (ОСГОП) заңымен реттеледі. Бұған сәйкес өмірі мен денсаулығына зиян келген жағдайда әр жолаушыға шамамен 22 мың долларға (10 995 160 теңге) дейін өтемақы қарастырылған.

Үшінші тұлғаларға келтірілген мүмкін зиянға қатысты әзірге сақтандыру компаниясына шағымдар түспеген.

"Егер шағымдар түссе, авиакомпаниямен белгіленген тәртіпте жұмыс істейміз", – деді "АльфаСтрахование" өкілі.

Еске салайық, қайғылы апат 2024 жылғы 25 желтоқсанда, AZAL әуе компаниясының ұшағы Бакуден Грозныйға рейс жасаған кезде болды. Ұшақ сыртқы әсерге байланысты құлады. Кейін апаттың Ресейдің әуе қорғаныс жүйелері соққы жасап, зақымдалғаны белгілі болды. Алайда Мәскеу бұған өзінің қатысы барын жоққа шығарып отыр.