Отырыс кезінде мұны ешкім байқай қоймаған.
Бейнеден алынған кадрлар
ERNUR.KZ. Канадалық саясаткер Билл Оливер парламентте сөйлеген сөзінде мәтінді жасанды интеллект көмегімен өңдеуге арналған нұсқаулықты байқамай оқып қойып, жұрт назарына ілікті. Бұл видео әлеуметтік желіде тез тарап кетті, деп жазады tengrinews.kz.
Не болды?
Lovin Malta мәліметінше, оқиға Канададағы Нью-Брансуик провинциясының заң шығарушы жиналысында Прогрессивті-консервативті партия атынан қатысқан депутат Билл Оливер сөз сөйлеп тұрғанда болған.
Ол сөз сөйлеп тұрып, бір сәтте былай дейді: "Міне, осы бөлімнің қысқа тармақтар жиынтығына емес, парламенттік сөзге көбірек ұқсайтын, табиғи әрі жатық нұсқасы".
Бұл сөйлем парламенттегі баяндаманың бір бөлігінен гөрі, мәтінді өңдеу кезінде ЖИ-көмекшілер беретін ұсынысқа көбірек ұқсайды. Бұл үзінді сөздің соңғы нұсқасында байқаусызда қалып қойған болуы мүмкін.
Отырыс кезінде мұны ешкім байқай қоймаған. Алайда видео жарияланғаннан кейін әлеуметтік желі қолданушылары оғаш сөзге тез назар аударды.
Сөзді кім дайындағаны белгісіз
The Independent мәліметінше, әзірге баяндаманы дайындау кезінде нақты қандай ЖИ қызметі пайдаланылғаны белгісіз. Сондай-ақ мәтінмен Оливердің өзі жұмыс істегені немесе оны қызметкерлерінің бірі жасағаны да түсініксіз қалып отыр.
Басылымның атап өтуінше, айтылған сөйлем үлкен тілдік модельдердің (LLM) мәтінді қайта жазу және өңдеу кезінде шығаратын әдеттегі нұсқауларына өте ұқсас.
Желі қолданушыларының реакциясы
1News мәліметінше, баяндама Нью-Брансуик тұрғындарының мүддесін қорғау жөніндегі омбудсмен кеңсесінің жұмысына арналған. Кейін бұл жазба Нью-Брансуикке арналған сабреддитте пайда болып, тез танымал болды. Пікір қалдырушылардың бірі болған жайтты заңгерлерден талап етілетін кәсіби стандарттармен салыстырса, енді бірі саясаткерді отставкаға кетуге шақырды.
Бұл оқиға саясатта жасанды интеллектіні пайдалану мәселесіне назар аудартты. Бүгінде мұндай құралдар баяндамалар, мәлімдемелер, құжат жобалары мен басқа да мәтіндерді дайындауға көмектеседі.
ЖИ-ді пайдалану қазір таңсық дүние емес. Дегенмен, Билл Оливермен болған жағдай нейрожелілер көмегімен дайындалған кез келген мәтінді көпшілік алдында сөйлемес бұрын мұқият тексеру қажеттігін еске салды.
1News атап өткендей, Жаңа Зеландия парламентінде де ресми материалдарды дайындау кезінде жасанды интеллектіні қолдану мәселесі талқыланып жатыр, бірақ бұған мұндай қателіктер емес, басқа жағдайлар себеп болған.
Өкілдер палатасының клергі Дэвид Уилсонның айтуынша, егер жазбаша өтініштердегі идеялар расында авторға тиесілі болса, оларды жақсарту үшін ЖИ-ді пайдалануға болады.
Ол басты мәселе құралда емес, қорытынды мәтіннің жасанды интеллектінің пікірін емес, адамның ұстанымын қаншалықты көрсететінінде екенін баса айтты.
