Достармен кездескенде дәмін бірге көруге, мерекеде сыйлық ретінде ұсынуға ыңғайлы
Сурет: ЖИ
Жапонның моти десерті жабысқақ күріштен жасалады. Дәстүрлі мотиға адзуки бұршақтарынан дайындалған паста салынады. Біздің талғамымыз бойынша ол аса тәтті емес. Десерттің әлемге таралуымен салмасының түрі де көбейді. Бүгінде моти ішінен балмұздақ, жеміс-жидек, шоколад, крем және басқа да салмаларды кездестіруге болады.
Десерттің ішіне салынатын қоспаны өз қалауыңызша өзгерте аласыз. Біз қайнатылған қоюлатылған сүтпен жасап көруді ұсынамыз. Оның қанық карамельді дәмі нәзік күріш қамырымен керемет үйлеседі. Сонымен қатар қоюлатылған сүттің қою консистенциясы қамырдың ішіне оңай орап, ұқыпты домалақ моти жасауға мүмкіндік береді.
Моти қазақ дастарханына қалай келді?
Қазақстандықтардың мотимен жақынырақ танысуына азиялық тағам мәдениетінің кең таралуы, жапон және корей мәдениетіне қызығушылықтың артуы, әлеуметтік желідегі гастрономиялық контенттің көбеюі әсер етті. Әсіресе ірі қалалардағы кофеханалар мен десерт дүкендерінің мәзірінен моти жиі көріне бастады.
Бастапқыда экзотикалық десерт ретінде қабылданған моти уақыт өте келе қазақстандық тәттіқұмарлардың талғамына бейімделді. Дәстүрлі адзуки пастасының орнына шоколад, жеміс, крем, балмұздақ, тіпті қайнатылған қоюлатылған сүт секілді бізге таныс салмалар қолданыла бастады.
Осылайша жапондық десерт қазақ дастарханына жергілікті талғамға бейімделген заманауи тәтті ретінде енді.
Қалайша сәнді, трендтегі десертке айналды?
Мотидің танымалдығын тек дәмімен түсіндіру қиын. Оның сыртқы келбеті де маңызды рөл атқарды. Жұмсақ, домалақ пішіні, түрлі түстері мен шағын мөлшері оны әлеуметтік желіге суретке түсіруге ыңғайлы десерттердің біріне айналдырды.
Instagram, TikTok және басқа да платформаларда тағамның сыртқы көрінісі оның танымалдығына айтарлықтай әсер етеді. Ал моти осы талапқа жақсы сәйкес келеді: түрлі түсті қамыр, ұқыпты пішін, ішіндегі ерекше салма және кескен кезде көрінетін қабаттар – барлығы да визуалды контент жасауға мүмкіндік береді.
Оған қоса, моти – порциясы шағын әрі бірден бірнеше дәмді байқап көруге болатын десерт. Бір қорапқа әртүрлі салмасы бар бірнеше моти жинауға болады. Бұл оны қонаққа апаратын сыйлық, мерекелік дастарханға қоятын тәтті немесе жай ғана шайға қосып жейтін десерт ретінде танымал етті.
Тағы бір ерекшелігі – моти дайындау технологиясының шығармашылыққа мүмкіндік беруі. Оның түсін, салмасын, пішінін өзгертуге болады. Сондықтан кондитерлер де, үй жағдайында тәтті дайындағанды ұнататындар да мотидің жаңа нұсқаларын жасап көреді.
Жастар арасында сұранысқа ие
Мұның бірнеше себебі бар. Біріншіден, қазіргі жас буын тағам таңдағанда оның дәмімен қатар сыртқы көрінісіне, ерекше болуына мән береді.
Екіншіден, моти азиялық мәдениетпен байланысты. Жапон және корей фильмдері, сериалдары, музыкасы мен әлеуметтік желідегі контент жастардың Азия мәдениетіне деген қызығушылығын арттырды. Соның нәтижесінде бұрын тек шетелдік фильмдерден немесе әлеуметтік желіден көрінетін тағамдарды өз қаласынан іздеп көруге деген қызығушылық пайда болды.
Үшіншіден, моти – таныс емес дәмді байқап көруге мүмкіндік беретін десерт. Мысалы, біреу дәстүрлі адзуки пастасын таңдаса, екіншісі шоколадты, жемісті немесе қоюлатылған сүтті нұсқасын ұната алады. Сондықтан моти жастар үшін жай ғана тәтті емес, жаңа гастрономиялық трендті байқап көрудің бір жолына айналып отыр. Қазір моти:
- туған күнге;
- қонаққа барғанда;
- мерекелік дастарханға;
- шағын сыйлық ретінде;
- құрбы-құрдастармен кездесуге
ұсынылатын десерт ретінде қарастырылады. Оның бірнеше түсті және бірнеше салмалы болып дайындалуы сыйлық қорабын әдемі көрсетуге мүмкіндік береді. Сондай-ақ әлеуметтік желіге жариялауға ыңғайлы. Ендеше, жапондық десертті үй жағдайында дайындап көрейік
Порция саны: 10
Дайындау уақыты: 30 минут
Калориясы: 1 порцияда – 226,69 ккал
Қажетті ингредиенттер:
- 110 г жабысқақ күріш ұны;
- 55 г ұсақ қант;
- 165 г ауызсу;
- 100 г жүгері крахмалы;
- 1 банка қайнатылған қоюлатылған сүт.
Дайындау тәсілі
1-қадам. Жабысқақ күріш ұнын қантпен және салқын ауызсумен біркелкі болғанша жақсылап араластырыңыз. Қоспаны микротолқынды пешке жарамды ыдысқа құйыңыз.
2-қадам. Ыдыстың бетін тағамдық пленкамен жабыңыз. Пленканы тісшұқығышпен бірнеше жерінен тесіңіз. Ыдысты микротолқынды пешке салып, толық қуатында 1 минут қыздырыңыз.
3-қадам. Ыдысты шығарып, қамырды біркелкі болғанша араластырыңыз. Қайтадан пленкамен жауып, микротолқынды пешке 30 секундқа қойыңыз.
4-қадам. Қамырды тағы араластырып, бетін жауып, 30 секунд микротолқынды пеште қыздырыңыз. Осы әрекетті тағы бір рет қайталаңыз. Нәтижесінде жабысқақ әрі жақсы созылатын қамыр шығуы керек.
5-қадам. Тегіс үстелге крахмалды молынан себіңіз де, қамырды жаюға кірісіңіз. Саусақтарыңызды крахмалға батырып, қамырды баса отырып, қалың жайма жасаңыз. Қамырды 10 минут суытыңыз.
6-қадам. Пышақты крахмалға батырып алып, қамырды шамамен 30 грамнан келетін бөліктерге бөліңіз.
7-қадам. Қолыңызды крахмалға батырып, әр қамыр бөлігін жалпақ шелпек тәрізді етіп жайыңыз. Бір жағын крахмалдан сілкіп тазалап, ортасына бір қасық қайнатылған қоюлатылған сүт салыңыз. Қамырдың шеттерін салманың үстіне көтеріп, біріктіріп жабыстырыңыз. Қатты баспай, қолыңызбен домалақтап, шар тәрізді пішін беріңіз. Осылайша қалған мотиаларды да дайындаңыз.
8-қадам. Дайын мотиаларды тағамдық пленкамен жауып, тоңазытқышта 1 сағатқа қалдырыңыз. Немесе бірден жеуге болады.
АСПАЗҒА КЕҢЕС
- Мотиге табиғи қызғылт түс беру үшін мүкжидек морсын, ал сары түс беру үшін аздап куркума қолдануға болады.
- Мотиге табиғи қызғылт түс беру үшін мүкжидек морсын, ал сары түс беру үшін аздап куркума қосуға болады.
- Десертке құлпынай орап жасауға да болады. Ол жағдайда жидекті тәтті күріш қамырына орамас бұрын, сыртын жабысқақтау қоспамен, мысалы, шоколадты ганашпен жұқалап қаптап алған дұрыс. Сонда қамыр құлпынайға жақсы жабысады.
Мотидің басты ерекшелігі – қамырының жұмсақ әрі созылмалы болуы. Ол кәдімгі бисквит, печенье немесе бәліш қамырына ұқсамайды. Бір рет жеп көрген адам мотидің дәмінен бұрын құрылымын есте сақтайды.
Моти жапондық дәстүрден бастау алғанымен, әр ел оны өзінің дәміне қарай өзгерте алады. Қазақстанда да моти біртіндеп экзотикалық тәттіден көпшілікке таныс, түрлі нұсқада дайындалатын заманауи десертке айналып келеді. Бұған десерттің жеңіл әрі жылдам дайындалуы, құнарлығы жағынан да жеңіл болуының әсері бар шығар.
Ханбибі ОРАЛ,
ОҚИ ОТЫРЫҢЫЗ:
МАСА мен ШЫБЫНды сіздің үйде не қызықтырады? Біз байқамайтын ҚАТЕЛІКтер
Аптап ыстықта ШӨЛ қандыратын, ЖЫЛДАМ дайындалатын 5 түрлі пайдалы НӘРСУ
