Сурет: logva.ru
Гипертония – денсаулыққа елеулі қауіп. Ол бізге жоғары қан қысымы ретінде белгілі. Бұлшықеттегі түйілу тамырды қысып, қан айналымын нашарлатады. Мұндай жағдай миды оттегімен қамтамасыз етуге кедергі келтіреді. Ми жүрекке көбірек жұмыс істеуді «бұйырады». Нәтижесінде қысым жоғарылайды. Қан тамырларындағы мәселелер жүрек-қантамыр жүйесінің ауруларының даму қаупін арттырып, күрделі асқынуларға әкелуі мүмкін. Гипертонияның дамуымен инсульт қаупі де өседі.
Мойынға арналған гимнастика – гипертонияны емдеудің тиімді жолы. Сонымен қатар, мойын остеохондрозының алдын алу тәсілі ретінде де пайдалы.
Жаттығулар бұлшықетті босаңсытатын жұмсақ массажға ұқсайды. Басты мақсат – мойын бұлшықеттерін сергіту арқылы түйілуді азайту. Қарапайым қозғалыстар денедегі ауырсынуды азайтып, қан қысымын қалыпқа келтіруге көмектеседі. Сонымен қатар, бұл гимнастиканы бас ауруы, ұйқысыздық, зейін шоғырлануының бұзылуы және мойын-жаға бөлігіндегі бұлшықет ауырсынуына шағымданатын адамдарға да ұсынады.
Барлық жаттығулар отырғышта немесе жайлы йога кілемшесінде, лотос қалпында орындалады. Арқаңызды тік ұстауды бақылаңыз. Айна алдында жасаған ыңғайлырақ.
«Метроном»
Басыңызды жаймен оңға қарай қисайтып, 30 секунд ұстап тұрыңыз. Сосын солға қисайтып, тағы 30 секунд тұрыңыз. 5 рет қайталаңыз.
«Серіппе»
Басыңызды төмен түсіріп, иегіңізді мойынға жақындатыңыз. 15 секунд ұстап, бастапқы қалыпқа келіңіз. 5 рет қайталаңыз.
«Аспанға көзқарас»
Басыңызды шама келгенше бір жаққа бұрып, 15 секунд ұстаңыз. Содан кейін екінші жаққа бұрып, тағы 15 секунд тұрыңыз. Енді алға тік қарап, 5 секунд демалыңыз. Сосын қайта екі жаққа кезек-кезек бұрып, 5 рет қайталаңыз.
«Қаңқа»
Сол қолыңызды оң иығыңызға қойып, басыңызды кері қарай бұрыңыз. 15 секунд ұстаңыз. Сосын екінші жақпен қайталаңыз.
«Факир»
Екі қолды алақанмен түйістіріп, барынша бастан жоғары көтеріңіз (намасте қалпы сияқты, тек одан жоғары көтересіз). Осы қалыпта отырып, бас пен мойынды оңға-солға бұрыңыз.
«Ұшақ»
Қолдарыңызды екі жаққа созып, 15 секунд ұстаңыз. Иық байламдары, жауырынның созылып жатқанын сезініңіз. Сосын түсіріп, 5 секундтан кейін қайталаңыз.
«Тырна»
Екі алақанды түйістіріп, кеуде тұсында ұстаған күйде иегіңізді жоғары көтеріңіз. Алақанды ажыратпастан, қолыңызды барынша төмен түсіріңіз. 15 секунд сайын бастапқы қалыпқа келіп, 3 секунд демалып, қайта қайталаңыз.
- Мойынға арналған гимнастиканы жеңіл созылу және босаңсытатын массажбен аяқтау ұсынылады.
- Жаттығуларды алғашқы 2 аптада күн сайын орындау қажет. Кейін аптасына 2-3 ретке дейін азайтуға болады. Әр жаттығу кем дегенде 3 минут жасалуы тиіс.
Аударған: А. Мейірханқызы,
ОҚИ ОТЫРЫҢЫЗ:
![](/assets/thumbnails/61/6163384d809cee44665716b6aa33353b.png ""Көрші палатадағы әйелді көргенде қатты ұялдым": жас ана асылық айтқанына өкінеді")
![](/assets/thumbnails/55/551af06b9523c9e2338581a5ffc49336.jpeg ""Енді ешкімнен сүйінші сұрамайтын болдым": өз ісіне өкінген әйел қателік жасағанын айтты")
