Әкім Екібастұз ЖЭО-ның қысқа дайындығын тексерді

Станциядағы жабдықтарды жөндеу жұмыстары кестеге сай жүргізіліп жатыр. Қыркүйек айының соңына дейін үш энергетикалық және үш су жылыту қазандығы дайын болады. Қалған төрт қазандықтың жөндеу жұмыстары қазан айының соңына дейін аяқталады деп жоспарлануда.

Жылу магистральдары да уақытында қайта жаңғыртылуы керек. Жұмыстарды 22 қыркүйекке дейін толық аяқтау жоспарланып жатыр.

Облыс әкімі тұрғын үйлердің жылу қабылдауға дайындығын да тексерді. 690 көпқабатты тұрғын үйдің 665-інде дайындық шаралары, яғни жылу жүйелерін шаю және қысымды сынау және тағы басқа жұмыстар аяқталды. Қалған үйлердегі жұмыстар осы аптаның соңына дейін аяқталады деп жоспарланып отыр.

Сондай-ақ облыс әкімі екі көпқабатты үйдің тұрғындарымен кездесіп, тұрғындар алдағы жылыту маусымы, аулаларды одан әрі абаттандыру және тағы басқа мәселер бойынша сұрақ қойды. Аймақ басшысы Екібастұз қаласының әкіміне тиісті қызметтермен осы мәселенің барлығын пысықтауды тапсырды.

Сондай-ақ аймақ басшысы 10 және 23 мектептерде болды. Білім ордаларының бірінде шатыр мен акт залын күрделі жөндеуден өткізу қажет болса, екіншісінде терезе, есіктерді ауыстырып, спорт алаңын орнату қажет. Жобалар бойынша тиісті құжаттамалар дайындалып жатыр.

Екібастұз 2022 жылдың 27 қарашасына қараған түні жылу электр орталығында апат болды. Бірнеше қазандық қондырғыларының апатты түрде тоқтауы салдарынан қаланың едәуір бөлігі 30 градустық аязда жылусыз және ыстық сусыз қалды. Кейін қалада төтенше жағдай жарияланды. Білім беру нысандары қашықтықтан оқыту форматына көшті, балабақшалардың жұмысы тоқтатылды. Қыс бойы екібастұздықтар пәтерлерінің суықтығына, жылытқышқа байланысты электр энергиясының қымбаттығына шағымданды. Кейбір көпқабатты үйлерде қатқан мұздың еруі салдарынан батареялар жарылып, пәтерлердің бірінде батареядағы су жылытқыштың ашық тұрған сымына жеткенде, бір отбасы электр тоғының соғуынан қайтыс болды. Маусым айында "Екібастұзжылуэнерго" ЖШС нысандарында болған апатқа қатысты сотқа дейінгі тергеуді прокуратура аяқтады.