Ақтөбеде мемлекеттік бағдарлама бойынша салынған екі үй апатты деп танылды

27.04.2023 09:04

486

Есет батыр тұрғын үй алабындағы көпқабатты үйлер 3 жыл бұрын салынған.

ERNUR.KZ. Ақтөбеде мемлекеттік "Нұрлы жер" бағдарламасы бойынша салынған қос үй апатты деп танылды. Ондағы 48 отбасы өзге пәтерлерге көшірілді. Ал іргетасы үгітіліп, қабырғасы қақырап тұрған ғимаратты сарапшылар жөндеуге болады деп шешкен, деп жазады zakon.kz.

Есет батыр тұрғын үй алабындағы көпқабатты үйлер 3 жыл бұрын салынған. Бұл үшін бюджеттен 400 миллион теңге бөлінген. Алайда қабырғалары жарылып, жертөленің бетон бағаналары ажырап кеткен, тіпті кей жерінің кірпіші құлап жатыр.

Бұған қоса, іргетасы отырып, үгітіліп кеткен. Апатты үйдің тұрғындары өзге жерге көшірілгенімен, кейін қайта қайтып келеді деп отыр. Өйткені ғимаратты тексерген сарапшылар күрделі жөндеуден соң бұл үйде тұруға болады деген шешім шығарған.

"Тексеру кезінде үйдің апаттық жағдайда екені анықталды. Ол құрылысқа пайдаланған бетонның сапасына қатысты болып отыр. Сараптамада бетон құрамына арзан материалдар пайдаланып, қалай болса солай жасаған болуы мүмкін екендігі айтылады. Енді үйдің іргетасын берік қылу үшін компанияларды тартып жатырмыз".Ақтөбе тұрғын үй инспекциясы бөлімінің жетекшісі Руслан Әжниязов