Алексей Цой Pfіzer вакцинасының бағасына қатысты пікір білдірді

ERNUR.KZ. Еліміздің Денсаулық сақтау министрі Алексей Цой Pfіzer вакцинасының бағасы туралы түсініктеме берді, деп жазады ҚазАқпарат.

«Баға тек Pfіzer вакцинасына қатысты, ал қалған вакциналарды азаматтар тегін ала алады. Аталған екпені коммерциялық компания сатып алып, ішкі нарықта ұсынады. Әдетте шара осылай жүзеге асады. Мысалы, тұмауға қарсы екпені мемлекеттік медициналық ұйымдардан да, жеке медициналық ұйымнан да алуға болады. Бұл да сол секілді. Жалпы вакцинаны жеткізу мен оны сақтау үлкен жауапкершілікті талап етеді және оңай шаруа емес. Жіті бақылау қажет. Pfіzer вакцинасының бағасына келсек, басқа елдермен салыстырғанда жоғары болмайды, қолжетімді баға болады», - деді А. Цой Үкімет үйінде тілшілердің сұрағына жауап бере тұра.

Бұған дейін министр елімізде Pfіzer вакцинасын алып жатқан жүкті әйелдер, емізулі аналар мен жасөспірімдердің жағдайы туралы айтып берген еді.

Сондай-ақ, ведомство басшысы Pfіzer екпесін алған жасөспірімдерге вакцина паспорты беріле ме деген сауалға жауап берді.

Және де Қазақстанда «Спутник Лайт» ресейлік вакцинасын өндіру мүмкіндігі туралы айтылды. Одан бөлек, А. Цой елімізде жаңажылдық корпоратив өткізуге қатысты түсініктеме беріп өтті.