30 қыркүйекте бекітілген Әлеуметтік әл-ауқат деңгейін айқындау әдістемесі – реформаға негіз болып отыр.
ERNUR.KZ. Мемлекеттік қолдау ең алдымен, өз еркімен қажеттілігін қамтамасыз ете алмайтын адамдарға көрсетілуі керек. Осыған байланысты жәрдемақы тағайындауда отбасының нақты мұқтаждық деңгейі бағаланады. Бұл туралы ҚР Еңбек және халықты әлеуметтік қорғау министрі Асқарбек Ертаев ОКҚ алаңында өткен баспасөз конференциясында мәлімдеді.
«Біз жәрдемақыны формальды тағайындаудан отбасының нақты мұқтаждық деңгейін бағалауға көшіп жатырмыз. Отбасының мүліктік және әлеуметтік жағдайы бағаланатын болады», – деді министр.
30 қыркүйекте бекітілген Әлеуметтік әл-ауқат деңгейін айқындау әдістемесі – реформаға негіз болып отыр. Әдістеме 2027 жылғы 1 қаңтарда күшіне енеді.
Әдістеме екі компоненттен тұрады: материалдық әл-ауқат және әлеуметтік тұрақтылық. Бірінші компонент алты бағыт бойынша 59 көрсеткішті қамтиды: кіріс және жұмыспен қамту, мүлік, көлік, бизнес, ауыл шаруашылығы және кредиттер.
«Мәліметтер мемлекеттік базадан алынады. Азаматтардан қосымша анықтама талап етілмейді. Бағалау барлық отбасы үшін бірыңғай критерийлер бойынша автоматты түрде жүргізіледі», – деді министр.
Екінші компонент – отбасының әлеуметтік тұрақтылығы. Отбасының құрамы, балалардың, қарт адамдардың және мүгедектігі бар адамдардың болуы ескеріледі. Асырауындағы адамдардың жүктемесі барынша жоғары болса, отбасының әлеуметтік тұрақтылығы төмен болады.
Осылайша, табыстың бірдей болуы әл-ауқат деңгейінің бірдей екенін білдірмейді. Әлеуметтік жүктемесі жоғары отбасыларға тиісті баға беріледі.
Бағалау нысаны – жәрдемақы алушының өзі емес, үй шаруашылығы. Бір мекенжай бойынша тіркелген отбасы мүшелері, туыстары және бірге тұратын басқа адамдар есепке алынады. Олардың табысы мен мүлкі ескерілетін болады.
Жалғыз тұратын ата-аналар белгіленген тәртіпке сәйкес, бөлек тұрған жағдайда да балаларының отбасы құрамына енгізіледі. Бұл ауқатты отбасылардың мемлекеттік төлемдер алу үшін жасанды түрде бөлінуіне жол бермеу үшін қажет.
«Реформа барлық жәрдемақыға берілмейді. 22 түрлі төлем бұрынғы тәртіппен сақталады. Оған ядролық сынақтар мен саяси репрессиядан зардап шеккен адамдарға берілетін төлемдер жатады. Зиянды еңбек жағдайларында жұмыс істеген адамдарға және мүгедектігі бар адамдардың жекелеген санаттарына арналған төлемдер сақталады», – деді Асқарбек Ертаев.
