Алматы облысында қой жүнінен тыңайтқыш өндіріле бастады

Бұл шағын кәсіпорында өндірілетін органикалық тыңайтқыш Швейцарияның органикалық ауыл шаруашылығы бойынша ғылыми-зерттеу институты FIBL (Органикалық ауыл шаруашылығы бойынша халықаралық биологиялық зерттеулер институты саласы) халықаралық тізіміне енгізілді. Бұл тізім органикалық егіншілікте қолдануға рұқсат етілген материалдар мен препараттарды қамтиды.

Тыңайтқыш топырақтың құнарлылығын жақсартады және өсімдіктерді 12 ай минералдармен қамтамасыз ете алады. Түйіршіктер ылғалды сіңіреді және бастапқы өлшемінен 20 есеге дейін кеңейе алады. Азот, фосфор, калий, күкірт, кальций және магний біртіндеп бөлінеді.

"Қой жүніне қатысты мәселе бар. Бұл тек тыңайтқыш өндірісінде емес. Жыл сайын жүн жағылады, бұл қоршаған ортаға зиянды. Біз шикізатты қырқу маусымында жинаймыз. Зауыттың қуаттылығы жылына шамамен мың тонна”, – деді зауыт директоры Айдын Құдайбергенов.

Зауытқа арналған жабдықтар Германиядан әкелінген. Алдымен қырқылған қой жүні тазартылады, содан кейін жоғары температурада зарарсыздандырылады. Нәтижесінде пайдалы минералдарға бай түйіршіктелген органикалық тыңайтқыш алынады. Сарапшылардың пікірінше, бір тонна табиғи жүннен шамамен 900 килограмм дайын өнім алуға болады.

"Толығымен органикалық өнім. Ешқандай химиялық заттар қосылмаған. Тек қой жүнінің өзінде кездесетін табиғи қосылыстар бар. Оның құрамында бес маңызды минерал бар және олардың барлығы дайын өнімде сақталады", – деді цех меңгерушісі Сымбат Әміров.

Жоба Ғылым және жоғары білім министрлігінің Ғылым комитетінің гранттық қаржыландыруымен жүзеге асырылды. Зауыт өнімдеріне қызығушылық Болгарияда, Ресейде, Оманда және бірқатар Еуропа елдерінде бұрыннан бар.