Алматыда 10 мыңнан астам адам тегін медициналық бақылаудан өтті

ERNUR.KZ. Қазіргі кезде дәрігерлер мегаполистің 40-тан астам шет аймақтарында болып, 10 мыңнан астам қалалықтарға тегін медициналық қызмет көрсетті және кеңестерін берді, деп хабарлайды Аlmaty.tv.

Алматы әкімі Бақытжан Сағынтаевтың тапсырмасы бойынша Қоғамдық денсаулық басқармасы 1 тамыздан бастап қолжетімді медициналық қызмет көрсету үшін жылжымалы мобильді кешендерді халық арасына жіберген болатын. Кешендердің барлығы қажетті қондырғылармен толық жабдықталған.

Айлықтың мақсаты – бір қадам жақын қолжетімді медициналық қызмет көрсету. Өйткені, халықтың көпшілігі алдын ала медициналық бақылаудан өту үшін емханаларға уақтылы бара бермейді.

Жалпы, бақылау кезінде жүрек–қан тамырлары патологиясының кең тарағаны анықталды. Қан қысымының көтерілуі - гипертония 80%-ды құрайды. Алғаш рет медициналық бақылаудан өткендер арасында «қант диабетіне» шалдыққандар да анықталды.

Медицина қызметкерлері көпшілік арасында міндетті медициналық сақтандыру, салауатты өмір салтын қалыптастыру бойынша ақпараттық-түсіндіру жұмыстарын да жоғары деңгейде жүргізуде.