Астанада ФАО-ның 80 жылдығы мен Дүниежүзілік азық-түлік күніне арналған Алма фестивалі өтті

ERNUR.KZ. БҰҰ Азық-түлік және ауыл шаруашылығы ұйымының (ФАО) 80 жылдығы мен Дүниежүзілік азық-түлік күніне орай Астанада Алма фестивалі өтті.

Іс-шара Ауыл шаруашылығы министрлігі мен ФАО Нидерланд Корольдігі Елшілігінің қолдауымен ұйымдастырылды.
Фестивальге дипломатиялық корпус өкілдері, фермерлер, аграрлық сектор сарапшылары және студенттер қатысты.
Іс-шара фермерлерді, жастарды, білікті мамандар мен халықаралық ұйым мүшелері арасындағы тәжірибе алмасу алаңына айналып, тұрақты және инклюзивті агроазық-түлік жүйелерін ілгерілетуге бағытталған күш-жігерді біріктірді.

«Алма фестивалі — бұл тек егін жинау мерекесі емес, сонымен қатар ауыл шаруашылығының бай дәстүрлерін және азық-түлік қауіпсіздігінің маңыздылығын көрсетеді. Біз өскелең ұрпақтың ауыл шаруашылығына, инновацияларға және халықаралық ынтымақтастыққа деген қызығушылығының артып келе жатқанын көріп жүрміз. Бұл – саланың жарқын болашағына деген сенімді күшейтеді», — деп атап өтті ҚР Ауыл шаруашылығы вице-министрі Ербол Тасжүреков.

ФАО-ның Қазақстандағы бағдарламалық үйлестірушісі Жаңыл Бозаева фестивальдің Қазақстанда өтуі ерекше символдық мәнге ие екенін атап өтті, өйткені Іле Алатауы мен Тянь-Шаньның етектері алманың отаны саналады.

«Бұл аймақ табиғи және мәдени мұраның бірегей орталығы саналады, сондықтан фестивальдің дәл осында өтуі ерекше мәнге ие. ФАО Ауыл шаруашылығы министрлігі және Нидерланд Корольдігінің Елшілігімен бірге 80 жылдық мерейтойы мен Дүниежүзілік азық-түлік күнін атап өтуде. Мұндай іс-шаралар тұрақты дамуға бағытталған серіктестікті күшейтіп, жастарды жаңа идеяларға шабыттандырады, сондай-ақ, Қазақстанда және одан тыс жерлерде агроазық-түлік саласын нығайтудың жаңа мүмкіндіктерін ашады», — деді ол.

Көкөніс және жеміс шаруашылығы институтының аты аңызға айналған қазақстандық «Апорт» сортына арналған «Апорт - әр алманың жүрегі» атты қызықты әрі мазмұнды таныстырылымы фестивальдің ерекше әсерлі сәтіне айналды.

Қонақтар айрықша алма сортының шығу тарихымен және мұрағаттық материалдарымен танысты.
Іс-шарада жастарға ерекше көңіл бөлініп: «Жастар, агроблогерлер және инновациялар» атты сессия барысында ФАО мен серіктестердің, соның ішінде World Food Forum National Youth Chapter және Youth Food Lab ұйымдарының халықаралық бағдарламалары, тәжірибелері мен цифрлық жетістіктері талқыланды.

Жастарды ФАО қызметіне тарту мақсатында тағылымдамалар, еріктілерге арналған бағдарламалар, стипендиялар және мансаптық мүмкіндіктер туралы айтылды.

Фестиваль аясында «Апорт» жәрмеңкесі ұйымдастырылып, онда Алматы, Жамбыл және Түркістан облыстарының фермерлері ұсынған үздік алма сорттары мен өнімдері қойылды.

Мереке концерттік бағдарламалармен, би флешмобтарымен, фотозоналармен, шеберлік сабақтарымен, түрлі байқаулармен және баршаға арналған спорттық ойындармен жалғасты.

«Бүгінгі фестиваль халықаралық ынтымақтастықтың, жергілікті өндірісті қолдаудың және жастарды агросекторға тартудың маңыздылығын көрсетті. Қазақстан ауыл шаруашылығында бай мұраға ие және оны жаһандық сын-қатерлер жағдайында сақтау мен дамыту – басты міндеттердің бірі», — деді ҚР Ауыл шаруашылығы вице-министрі.