"Ауа жетпей құлады": Өскемен-Алматы пойызында 74 жастағы ер адам қайтыс болды

Жолаушының айтуынша, пойыздың іші ыстық, дем алу мүмкін емес.

“Ер адамды әйелі тамбурға шығарды. Сол кезде ер адамға ауа жетпей құлап, тіл тартпай кетті. Бұл жағдайдың бәрі ерлі-зайыптының 13 жастағы немересінің көзінше болды. Пойыздың ішінде алғашқы көмек көрсететін дәрі-дірмек те болмады”, – деп жазды видео авторы.

Қайтыс болған ер адам мен оның әйелі Сарыөзектен түсіп қалды.

“Сарөзектің жедел жәрдемінде де, өлік таситын көлігінде де зембіл жоқ. Адамды көрпе мен төсек жаймасына салып алып кетті”, – деп жазды автор.

Куәгер видеода жолаушылар кетіп бара жатқан пойыздың ішін көрсеткен.

Көліктегі полиция департаменті адам өлімін растап, болған сотқа дейінгі тергеу басталғанын мәлімдеді. Сондай-ақ ҚТЖ жағдайға қатысты пікір білдірді.

“1 тамызында Сарыөзек станциясында №351 Өскемен-Алматы пойызының бастығы 74 жастағы жолаушының денсаулығының күрт нашарлауына байланысты жедел жәрдем шақырды. Пойыз жолсеріктері жолаушылармен және медицина қызметкерлерімен бірлесіп, алғашқы медициналық көмек көрсету үшін барлық шараларды жасады. Өкінішке қарай, жедел жәрдем бригадасы жолаушының қайтыс болғанын айтты. Сапар кезінде жолаушы өзін нашар сезінгенін кондукторға айтпаған. Жолаушы әйелімен бірге Жарғыз-төбе станциясынан Алматыға бет алған. Әйелінің айтуынша, ер адам астмамен ауырған жән жақында оған ота жасалған. Жолаушының отбасына көңіл айтады”, – делінген хабарламада.