Шипажайға жолдама беру үдерісі geo-shym.kz сайты арқылы автоматтандырылған.
Шымкент қаласында зейнеткерлердің денсаулығын нығайтуға және олардың өмір сапасын жақсартуға бағытталған әлеуметтік қолдау шаралары жүйелі түрде жүзеге асырылуда.
Қала әкімінің бастамасы және мәслихаттың шешімі негізінде биыл зейнеткерлерге 5 500 шипажайлық жолдама беру қарастырылған. Осы мақсатта мемлекеттік әлеуметтік тапсырыс аясында 5 шипажаймен келісімшарт жасалған. Осы жылдың 1 қарашадағы жағдай бойынша аталған шипажайларға 3 850 жолдама берілді.
Атап айтқанда:
«Ақсу демі» – 770 жолдама;
«Күлпаршын» – 575 жолдама;
«Zari» – 580 жолдама;
«Түлкібас саясы» – 575 жолдама;
«Айша бибі» – 1 350 жолдама.
Сонымен қатар, басқармаға қарасты «Ізетті зейнеткер» орталығында да санаторлық-сауықтыру қызметтері көрсетілуде. Бүгінгі күнге дейін орталыққа 2 880 зейнеткер жолданған.
Осылайша, жыл басынан бері қала бойынша жалпы 6 730 зейнеткер шипажайлық-сауықтыру қызметімен қамтылды. Жыл соңына дейін бұл көрсеткішті 9 мыңға жеткізу жоспарланып отыр.
Айта кетейік, шипажайға жолдама беру үдерісі geo-shym.kz сайты арқылы автоматтандырылған. Қазіргі таңда электронды кезекте 30 мыңнан астам азамат тіркелген. Бүгінде 2024 жылға дейін кезекке тұрған зейнеткерлерге жолдамалар кезең-кезеңімен берілуде.
