Ауыл шаруашылығы министрі: Нан бағасының күрт өсуіне жол берілмейді

ERNUR.KZ. Бұл туралы орталық коммуникациялар қызметінде өткен брифингте ауыл шаруашылығы министрі Ербол Қарашөкеев мәлімдеді, деп жазады Stan.kz.

“Ел ішінде, ең маңызды үлкен блоктарға тоқталсақ, азық-түлік себетіне өте үлкен әсерін тигізетін әлеуметтік нан бағасы (бұл бірінші сұрыпты 550 грамм нан) бойынша сұрақ туындайды. Нан бағасының тұрақтылығын қамтамасыз ету бойынша шаралар кешені қабылданады, бірінші кезекте бұл "әлеуметтік" нан өндіретін барлық кәсіпорындарды астықпен, қажетті ұнмен қамтамасыз ету. Осы мақсатта Азық-түлік келісімшарт корпорациясы мемлекеттік резервтерден арзандатылған астықты ұн тарту кәсіпорындарына "әлеуметтік" нан өндіру үшін жібере алатындай етіп заңнамаға өзгерістер енгіземіз. Үкімет бұл мәселені тұрақты бақылауда ұстайды, біз өңірлерге қызметтерді бөлдік.

Айтқанымдай, әлеуметтік нанның күрт өсуіне жол берілмейді. Ол үшін бізде барлық құралдар бар. Өткен жылғы түсімді ескере отырсақ, қажетті миллион тонна резерв бар. Бұл резервтерді тек астықта ғана емес, сондай-ақ мал шаруашылығы саласын қолдауға да пайдаланамыз. Сондықтан әлеуметтік нан үшін күрт өсім болмауы керек. Осыған байланысты мен нанның бағасы ақылға қонымды шекте болады деп ойлаймын”, – дейді ауыл шаруашылығы министрі.

Оның айтуынша, биыл өнімділік төмен, 10 центнер, өткен жылы гектарынан 13 ц болған. Бірақ жиналған көлем ішкі қажеттіліктерді қанағаттандыру үшін жеткілікті болады. Бұл нан мен тағамға арналған бидай. 2 миллион тоннаға жуық астық тұқымдық материал ретінде жұмсалады, сондай-ақ астық мал шаруашылығында өте қарқынды пайдаланылады. Сонымен қатар өткен жылғы қорларды қоса алғанда, 6,5 млн тонна экспорттық әлеует бар.