​Әжетханада өз құрдастарын ұрып-соққан жасөспірімдердің видеосы: Оқиғаның мән-жайы

ERNUR.KZ. Сотқа дейінгі тергеу шаралары барысында әжетханада өз құрдастарын ұрып-соғып, осыны видеоға түсірген жасөспірімдердің кім екені белгілі болды, деп жазады Тengrinews.kz ҚР ІІМ ішкі және сыртқы коммуникациялар департаментінің директоры Алмас Садубаевқа сілтеме жасап.

"Оқиға бір жыл бұрын, 2018 жылдың 10 қаңтарында түсірілгені анықталды. Ол кезде оқушылардың ата-анасы полицияға арыз бермеген", - делінген хабарламада.

Сотқа дейінгі тергеу шаралары ҚР Қылмыстық кодексінің 293-бабы 2-бөлігі ("бұзақылық") бойынша жүріп жатыр. Бұл бап бойынша айыпталушы 5 жылға дейін бас бостандығынан айырылуы мүмкін. Таяуда әлеуметтік желілерде дәретханада түсірілген видео таралды. Онда жасөспірімді бірнеше адам соққыға жығып жатады.

Еске салайық, осыдан бірнеше күн бұрын Түркістанда мектеп оқушыларының соққыға жығылғаны түсірілген тағы бір видео таралған еді. Кейінірек полицейлер мектеп оқушыларын ұрып-соққандарды анықтаған болатын. Түркістанда жедел баспасөз мәслихаты өткізіліп, Түркістан облыстық білім басқармасындағылар осы видеоға қатысты пікір білдірген еді. Олардың сөзіне қарағанда, Түркістандағы үш мектептің - № 31, № 18, № 11 тоғызыншы сынып оқушылары анықталған.