Баласы зорланғанын мәлімдеген алматылық істің мән-жайын айтты

ERNUR.KZ. Алматыдағы жекеменшік мектептердің бірінің әжетханасында бірнеше рет зорланды деген баланың әкесі оқиғаның мән-жайын айтып берді, деп жазады tengrinews.kz.

Әкесінің айтуынша, ұлына қатысты зорлық-зомбылық туралы алғашқы белгілер былтырғы желтоқсанда анықтала бастаған. Оқушының басында гематомалар байқалған. Сынып жетекшісі мұның себебін анықтауға уәде берген.

Әкесі баланың ластанған киімін көргенде зорлық болғанына көз жеткіздім дейді.

"Мен "бұл не" деп сұрадым, ол "бояу ғой, әке" деп қана жауап берді. Сосын тазалай бастады. Сосын бұл бояу болса неге тез тазаланатынын сұрадым. Сонда ұлым былай деді: жаңа жылдан кейін Рамазан мен Кәрім әжетханада осылай істей бастады. Оқытушы сабақ кезінде жібереді екен, мәжбүрлеп шығарып жібереді екен", - дейді баланың әкесі Мұстафа.

Ер адам ұлын жетінші сынып оқушылары зорлағанын айтады, ал оқытушылар мен мектеп басшылығы бұған көз жұмды деп отыр.

"Біреуі қолын ұстап тұрады, дейді. Екіншісі көзін жабады екен. Сосын әдетке айналған сияқты. Қанша рет болды деп сұрасам, 10-12 рет болғанын айтып отыр. Өзі солай деді. Тағы біреуі бар дейді. Ересектеу. Ол үлкендеу, басқа сыныпта оқиды. Заттар болған, тергеушіге өткіздім, онда адам нәжісі мен шәует болды. Шалбарынан да табылды", - дейді оқушының әкесі.

Бірақ білім беру мекемесінің педагогтері бала зорланды деген ақпаратты жоққа шығарып отыр.

"Қайталап айтамын: бұл жалған ақпарат. Маған сағат алтыда ақпарат келіп түсті, мен бұл қызға бірден былай деп жаздым: Сіз мектепте болдыңыз, оқытушылармен, балалармен сөйлестіңіз бе? Камераға түскен видеоны қарап шығуға болады, дискті полиция алып кетті", - деді бірінші сынып оқытушысы Наталья Канаева.

Білім және ғылым министрлігі өкілдері мектепте тексеріс жүретінін хабарлады. Оқиғаның мән-жайын анықтау үшін Балалар құқығын қорғау комитетінің қызметкерлері Алматыға аттанған. Сараптама зерттеулері тағайындалып, оның нәтижесінде зорлық дерегі бар-жоғы тексеріледі.