Биыл 20 миллиард теңгеге жетім балаларға арналған пәтерлер сатып алынады

01.06.2023 17:33

601

Әлеуметтік осал санаттағы балалар үшін оқуға квота да қарастырылған – бүгінде ол мемлекеттік тапсырыстың 1%-ін құрайды.

ERNUR.KZ. Биыл халықтың әлеуметтік осал топтары үшін жалға берілетін пәтерлерді сатып алуға 100 миллиард теңге, оның ішінде жетім балаларға кемінде 20 миллиард теңге бөлінеді. Бұл туралы Қазақстанның премьер-министрі Әлихан Смайылов айтты, деп жазады sputnik.kz.

Оның айтуынша, бүгінде жетім балалардың баспана алуға бірінші кезектегі құқығы бар. Оларға заңды түрде коммуналдық тұрғын үй қорынан немесе жеке тұрғын үй қорынан әкімдіктер жалға алған тұрғын үйдің кемінде 20%-і бөлінеді.

"Осы жылы халықтың әлеуметтік осал топтары үшін жалдамалы пәтерлерді сатып алуға республикалық бюджеттен 100 миллиард теңгеден астам қаражат бөлінді. Кемінде 20%-і жетім балалар мен ата-анасының қамқорлығынсыз қалған балаларға беріледі. Оған қоса, әр өңірде осы санаттағы балаларды қолдау бойынша бюджеттен тыс және демеушілік қаражат есебінен тұрғын үймен қамтамасыз ету шараларын қарастыратын өзінің кешенді жоспарлары бар", - деді премьер-министр елордадағы Қиын өмірлік жағдайдағы балаларды қолдау орталығына барған кезінде.