Спикер 2025 жылғы 1 қыркүйектен бастап Денсаулық сақтау министрінің 2025 жылғы 4 наурыздағы бұйрығымен бекітілген тамақтанудың жаңа стандарты күшіне енгенін еске салды.
ERNUR.KZ. Қазақстанда 2023 жылдан бері барлық бастауыш сынып оқушылары, сондай-ақ мемлекеттік атаулы көмек алуға құқығы бар жекелеген санаттағы балалар тегін ыстық тамақпен қамтамасыз етіледі. Алайда, талдау оқушыларға берілетін тағамдарда көкөністер, жемістер мен сүт өнімдері жетіспейтінін, ал тұз, қант және майдың мөлшері артық екенін көрсетті. Мұндай теңгерімсіздік балалық шақта семіздік, қант диабеті және жүрек-қан тамырлары ауруларының болу қаупін арттырады. Осыған байланысты мемлекет мектепте дұрыс тамақтануды ұйымдастыруды басым бағыттардың бірі ретінде белгілейді. Бұл туралы ОКҚ алаңында өткен дөңгелек үстелде ҚР ДСМ Санитариялық-эпидемиологиялық бақылау комитеті төрағасының орынбасары Нұрқан Сәдуақасов мәлімдеді.
Спикер 2025 жылғы 1 қыркүйектен бастап Денсаулық сақтау министрінің 2025 жылғы 4 наурыздағы бұйрығымен бекітілген тамақтанудың жаңа стандарты күшіне енгенін еске салды. Ол барлық білім беру ұйымына – балабақшаларға, мектептерге, колледждерге және сауықтыру лагерлеріне қолданылады.
«Дұрыс тамақтанудың заманауи халықаралық тәсілдері Стандарттың негізін қалады. Оған енгізілген негізгі өзгерістер: ДДСҰ ұсынысы бойынша қант құрамын 3,6 есе, ал тұзды 5 есе азайту, тағамдарда көкөністер, жемістер мен сүт өнімдерінің үлесін арттыру, мәзірден шұжықтарды, қақталған етті, спредтерді және қант пен тұзы көп басқа да өнімдерді алып тастау, тәтті сусындардың орнына су, сүт, қышқыл сүт өнімдері, жеміс шайлары және қант мөлшері аз компоттар ұсынылады», – деді Нұрқан Сәдуақасов.
Сонымен қатар жаңа стандарт алғаш рет шағын жинақталған мектептерде тамақтануды ұйымдастыруға, сондай-ақ ерекше диеталық қажеттіліктері бар балаларды қамтамасыз етуге қойылатын жеке талаптарды бекітеді. Сонымен қатар, құжатқа «Жеуге жарамсыздық индексі» ұғымы – тамақ қалдықтарының сандық көрсеткіші енгізілді. Бұл мектеп оқушыларының ұсынылған тағамға қаншалықты қанағаттанатынын және оны ұйымдастырудың бүкіл жүйесінің тиімділігін бағалауға мүмкіндік береді.
«Стандартты орындау үшін көп нұсқалы типтік мәзірлер әзірленді. Алғаш рет ыстық тағамдарды дайындауға жағдайы жоқ шағын жинақталған мектептер үшін арнайы мәзір жасалды. Жасына қарай қажеттіліктер, калория мөлшері, маусымдылығы, сондай-ақ ас блогы жоқ мектептердің ерекшеліктері ескерілді. Үлгілік перспективалық мәзір ұсынымдық сипатқа ие және ата-аналар мен балалардың пікірлерін, сондай-ақ жергілікті өнімдердің қолжетімділігін ескере отырып бейімделе алады», – деп атап өтті спикер.
Ведомство өкілінің айтуынша, оқу жылы ішінде желінбеген тағамдар индексін бағалауды қоса алғанда, стандартты енгізуге мониторинг жүргізілетін болады. Бұл индекс жоғарылаған кезде тағамды құндылығы бірдей, бірақ балалар үшін қолайлы тағаммен ауыстыруға рұқсат етіледі. Барлық өңірлерде жаңа стандартқа сәйкес төрт апталық мәзірлер бекітілді.
![](/assets/thumbnails/a9/a9c0e80a4a173ecd044741471a7f10a4.png ""Алты жасар ұлым "ұры" атанды"")
![](/assets/thumbnails/c2/c28d09d6e2b3081efdf93f257f6c86a2.jpg ""Маған масыл болма, жұмыс істе!": жалғызбасты ана әкесінің берген өмірлік кеңесін бөлісті")
