Қазақстандықтар жылу ақысына балкон үшін де қосып төлейді

Фото: Ru.freepik.com
ERNUR.KZ. Елімізде жылу ақысына балконның шаршы метріне байланысты төлем қосылады. Бірақ бұл тәртіп барлығына бірдей қатысты емес, деп жазады Stan.kz.

Балкон үшін жылуға төлеу-төлемеу мәселесі жалпы үйдегі есептеуіш құралдың болу-болмауына байланысты. Санайтын құрал жоқ, ал балкон қонақ, не ас бөлмеге жалғанса, оның аумағы пәтердің жалпы ауданы ретінде есептеледі. Осылайша оның шаршы метрі тарифке әсер етеді.

Мысалы, пәтердің тұрғылықты аумағы 50 шаршы метр, ал балкон 5 квадрат. Ал жылу ақысы үйдің ауданына қарай есептеледі делік.Сіз балконды ортадағы қабырғаны бұзып, бір бөлмеге жалғап қосасыз. Осылайша техникалық құжат бойынша пәтердің ауданы 55 шаршы метр болады. Мұндай өзгерістен кейін жылу тарифі қымбаттайды.

“Балконды мысалы қонақ бөлмесіне қосқан жағдайда онда ол пайдалы ауданға кіреді. Оған төлемақы ескерілетін болады. Есептегіш құрал болса ол нақты қанша қолданды, соған байланысты төлейді”, – дейді Ұлттық экономика министрлігінің табиғи монополияларды реттеу комитетінің басқарма басшысы Ақтөре Дидаров.

Жылу тарифін есептеуге қатысты тәртіп көбіне ескі үйлерге әсер етеді. Себебі қазір жаңа баспаналар есептеуіш құралмен қамтамасыз етілген. Тұрғыны балконды қоссын-қоспасын, бөлмесін кеңейтсін-кеңейтпесін қолданғанына қарай ақысын өтейді.

“Бұл әділетсіз. Өйткені балкон үйге бәрібір бөлме болмайды. Әр адамның өзінің таңдауы ғой. Мысалы, балконы бар үйлер бар, кейбір тұрғын үй кешендері ескі, жоқ. Қазір енді көбінде бар. Әділетсіз деп ойлаймын”, “Егер жылу қосса, негізі қосса шаршы метрі көбейеді ғой. Сондықтан иә, қосылу керек. Балкон ол тұратын жер емес. Негізі ол апатты шығу есігі болу керек”, “Егер жылымаса қалай тариф төлейсіз? Егер жылытып жатса төлеуге болады, әрине. Адамдардың арасында қосып алғандар бар. Бірақ ол дұрыс емес негізі”, – дейді көпшілік бұл өзгерістерге қарсы екенін айтып.

Заңға сәйкес, баспанада бір бөлме үлкейіп, екіншісі кішірейген кезде, балкон қосылып, не бөлінсе мүліктің кадастрлық құжаты жаңартылады. Алайда үйді сатқан кезде ескі паспорты да жарай береді. Ол заңды күшін жоғалтпайды. Бірақ “Азаматтарға арналған үкімет” мемлекеттік корпорациясының хабарлауынша, пәтерді ипотека арқылы рәсімдегенде банктер жаңартылған техникалық құжатты талап етеді.