Оқушыларға берілген ақшалай сертификатты мұғалімдер жинап алғаны туралы ақпарат тарады

Аудиожазбада әйел адам Президент шыршасынан кейін Іле ауданындағы №46 мектептің оқушыларына облыс әкімі берген ақшалай сертификаттарды автобуста мұғалімдер алып алғанын айтады. Ата-аналар мән-жайды білмек болып мектеп әкімшілігіне хабарласқанда, ол ақшаның орнына киім-кешек берілетінін естіген.

«Бізге облыстан келген тапсырма бойынша ата-аналардың қолына ақша емес, бір-ақ рет киім-кешек беріледі», - дейді аудиожазбадағы әйел.

Аталған жайтқа қатысты Алматы облысының білім басқармасы түсініктеме берді.

«Ақша сертификаттары қолма-қол ақшаға айналдырылып, қамқоршылар мен ата-аналарға тапсырылды. Бұған дейін ол сертификаттар оқушылар жоғалтып алмас үшін қауіпсіздік мақсатында жиналып алынған. Аудиожазбаға қатысты мәліметтер нақтыланып жатыр, ақпарат кейінірек жарияланады», - делінген ведомство хабарламасында.