Шымкенттіктер маңызды саяси шараға белсенді қатысуда

08.12.2024 17:57

891

Дауыс беру кешкі сағат 20.00-ге дейін жалғасады.

ERNUR.KZ. Бүгін елімізде ҚР мәслихаттарының шығып қалған депутаттарының орнына сайлау өтуде. Шымкент қаласының №16 сайлау округі бойынша сайлау учаскелерінде дауыс беру заң аясында ұйымдастырылған. Қазығұрт шағынауданындағы №69 сайлау учаскесінде тұрғындар таңғы сағат 7.00-ден бастап өз таңдауларын жасап жатыр.

№16 округтік сайлау комиссиясының төрағасы Найла Ширтаеваның айтуынша, аумақта жалпы 43 мың дауыс беруші бар. Ал аталған сайлау учаскесінде 2460 адам тізімге алынған. Әзірге заң бұзушылық жағдайлары тіркелмеген.

Шағынаудан тұрғыны Айнұр Құралбайқызы азаматтарды саяси іс-шараға белсене қатысуға шақырды.

–Бүгінгі іс-шараның маңызы зор. Еліміздің болашағы үшін дауыс беруге келіп, өз таңдауымды жасадым. Жалпы қоғамның, азаматтардың өмір сапасының жақсаруына әсер ететін сайлауда тұрғындар белсенділік танытуы тиіс, – дейді ұлағатты ұстаз.

№ 69 сайлау учаскесінде шағынаудан тұрғындары белсенділік танытып, дауыс беруде. Дауыс беру кешкі сағат 20.00-ге дейін жалғасады.