суреттер: mel.fm сайтынан

Кейде біз мұғалім дегенде тек сабақ түсіндіретін адамды елестетеміз. Бірақ өмірде оқушылардың жүрегінде мәңгі қалатын ұстаздар болады. Олар тек білім беріп қана қоймайды, қиын сәтте қолдайды, шабыт береді, тіпті өмірге деген көзқарасты өзгертеді. Әлемнің әр түкпірінде дәл осындай ерекше мұғалімдер бар. Төмендегі оқиғалар — соның дәлелі.

Оқушысының көңілін көтеру үшін шаш үлгісін өзгерткен мұғалім

Бір бастауыш сынып оқушысын сыныптастары сыртқы келбетіне бола мазақтап жүрген. Мұны білген мұғалім қыздың көңілін көтерудің ерекше жолын тапты. Келесі күні ол мектепке дәл сол қыз сияқты шаш үлгісін жасап келді. Мұғалімнің бұл әрекеті қызға үлкен қолдау болды. Ал сыныптастары да бұл жағдайдан кейін өз әрекеттеріне басқаша қарай бастады.

Оқушылардың суретінен жасалған көйлек

Сурет пәнінің мұғалімі бір күні ерекше идея ұсынды. Ол ақ көйлек тігіп алып, оқушыларынан көйлектің етегін түрлі бояумен безендіруді сұрады. Балалар өз қиялдарын еркін көрсетіп, көйлекті түрлі суреттермен бояп шықты. Кейін мұғалім сол көйлекті балалар суреттерінің көрмесіне киіп келді. Осылайша әр оқушы өз еңбегінің бір бөлігі мұғалімнің киімінде тұрғанын мақтанышпен көрді.

Сабақты тоқтатпай, сәбиді жұбасқан ұстаз

Бір студент лекцияға сәбиімен бірге келген. Ол бала күтуші жалдауға жағдайы жетпейтінін айтқан. Сабақ кезінде сәби жылай бастағанда, мұғалім еш ойланбастан баланы қолына алып, оны тербетіп тұрып лекциясын жалғастыра берген. Бұл көрініс аудиториядағы барлық студенттердің жүрегін елжіреткен.

Тақтадағы нағыз өнер

Жапониялық мұғалім Хиротака Хамасаки сабақ басталғанға дейінгі бос уақытын ерекше өткізеді. Ол тақтаға формула немесе тапсырма жазбайды. Оның орнына түрлі суреттер мен картиналар салады. Бұл өнер түрі Жапонияда тіпті жеке мәдениетке айналған. Оны «Kokuban Art», яғни тақтадағы өнер деп атайды.

Сабақтағы жаңа «оқушы»

Бір күні мұғалім мектептің кіреберісінен кішкентай, панасыз мысық тауып алады. Оны далада қалдырмай, сыныпқа алып кіріп, сол күні сабақты жаңа «қонақпен» бірге өткізеді. Оқушылар үшін бұл күн ерекше есте қалады.

Биология сабағындағы ерекше түсіндіру

Кейбір мұғалімдер тақырыпты түсіндіру үшін ерекше тәсілдерді қолданады. Мысалы, бір биология мұғалімі адам денесінің құрылысын түсіндіру кезінде өз денесін пайдаланып, түрлі қозғалыстар арқылы балаларға өте қызықты әрі түсінікті сабақ өткізген.

Картаны ұмытып кеткен география мұғалімі

География сабағында мұғалім бір күні маңызды нәрсені — картаны — ұмытып кетеді. Бірақ ол сасқалақтамайды. Бор алып, тақтаға бүкіл картаны өз қолымен сызып шығады. Оқушылар оның шапшаңдығына да, шеберлігіне де таң қалады.

Соңғы тапсырма...

Бұл оқиға Жапонияда болған. Ауыр дертке шалдыққан мұғалім өзінің соңғы сабағы екенін білген. Ол оқушыларына үй тапсырмасын ерекше түрде жазып қалдырған:

Соңғы тапсырма
Тапсыру уақыты: белгісіз
Өтінемін, бақытты болыңыздар.

Бұл тапсырманы орындап болған кезде,
мүмкін мен бұл өмірде болмайтын шығармын.

Асықпаңыздар.
Бір күні болашақта
маған: «Мен бақыттымын» деп айтсаңыздар болды.

Мен күтемін...

Бұл жазбаны оқыған оқушылар да, мұғалімдер де көз жасын тыя алмаған.

Мұғалім мамандығы тек білім берумен шектелмейді. Кейде бір жылы сөз, бір ерекше әрекет немесе бір сабақты өзгеше өткізу оқушының өмірінде үлкен із қалдыруы мүмкін. Осындай ұстаздар шәкірт жүрегінде мәңгі сақталады. Сондықтан нағыз мұғалім — тек пән үйрететін адам емес, ол адам өміріне әсер ететін тұлға.