Шымкент әкімінің шыршасында әр балаға 100 мың теңгелік сертификат табысталды

Шымкенттегі «Оқушылар» сарайында қала әкімінің «Біз – еліміздің жарқын болашағымыз!» атты жаңа жылдық шыршасы өтті, деп хабарлайды ERNUR.KZ.

Арнайы ұйымдастырылған мерекелік шараға жетім және ата-анасының қамқорлығынсыз қалған, тұрмысы төмен, әлеуметтік аз қамтамасыз етілген, көп балалы отбасы балалары, мүмкіндігі шектеулі бүлдіршіндер және білім, өнер, спортта жетістіктерге қол жеткізген талантты да дарынды 250 оқушы қатысты.

Сондай-ақ, балаларды жаңа жылдық мерекемен қала әкімі Ерлан Айтахановтан бөлек қалалық мәслихаттың хатшысы Ғани Ташқараев, «Нұр Отан» партиясы қалалық филиалының төрағасы Бахадыр Нарымбетов, қалалық ардагерлер кеңесінің төрағасы Исамуддин Рысбаевтар құттықтай келген.

Тиісінше, шыршаға қатысқан шымкенттік балғындар ертегілер әлеміне серуендеп, жаңа жылдық қойылымның ерекше кейіпкерлерімен жүздесті. Сонымен қатар, әр балаға 100 мың теңге көлемінде қаржылай сертификат табысталды.

Өз кезегінде, балалардың қуанышын бөліскен қала басшысы оқушыларға ыстық лебізін білдіріп, ағалық ақылын айтты.

«Құрметті балалар! Сіздерді келе жатқан Жаңа жыл мерекесімен шын жүректен құттықтаймын! Жаңа жыл жаңа ғажайыпқа толы мереке. Қазіргі таңда біздің елімізде білім алуға, еңбек етуге және демалуға барлық жағдай жасалып жатыр. Сондықтан, өздеріңізге сенімді болыңыздар. Отанды сүйіңіздер. Қашанда жақсылық жасап, мейірімді болуға тырысыңыздар. Сіздердің бүгінгі жасаған игі істеріңіз - бақытты болашақтың іргетасы. Еліміздің сенімін ақтайтын үлкен азамат болыңыздар. Жаңа жыл сіздерге көп қуаныш әкелсін», - деді Ерлан Қуанышұлы.

Шара соңында балдырғандарға мерекелік тәттілер үлестіріліп, олар қала басшысымен естелікке суретке түсті.

дереккөз: Шымкент қаласы әкімінің баспасөз қызметі