ЖАСАНДЫ ИНТЕЛЛЕКТ: дұрыс қолданған студент ЕҢ БІЛІМДІ болады

көрнекілік: hbc.ru сайтынан

Қазір студенттердің көбі ЖИ десе бірден «реферат жаздырып алайын» деп ойлайды. Бірақ мәселе рефератта емес. Реферат – уақытша тапсырма, ал ой жаза білу – өмір бойы керек дағды. Жасанды интеллектіні дұрыс қолдансаң, ол сен үшін дайын мәтін беретін құрал емес, ойыңды ашатын серіктеске айналады.

Көп студенттің басты қателігі – ЖИ-ге «осы тақырыпта мәтін жазып бер» деп сұрауы. Сол сәттен бастап ойлау тоқтайды. Ал шын мәнінде ЖИ-ді мәтін жаздыру үшін емес, ойды жүйелеу үшін қолдану керек.

Бірінші әдіс – сұрақ арқылы ой ашу. Мысалы, тақырыпты алып, ЖИ-ге «осы мәселе неліктен маңызды?», «бұған қарсы қандай пікірлер бар?», «қазақстандық студент үшін бұл тақырып қалай көрінеді?» деген сұрақтар қой. ЖИ жауап береді, бірақ сен сол жауапты көшірмейсің. Сенің міндетің – сол жауаптан өз ойыңды табу.

Екінші әдіс – пікірталас жасау. ЖИ-ге «мен мына пікірмен келіспеймін, қарсы аргумент айт» деп жаз. Немесе керісінше, «мені осы ойға сендір» де. Осы кезде сенің миың жұмыс істей бастайды. Себебі сен дайын мәтінді емес, өз позицияңды қорғауға тырысасың.

Үшінші әдіс – шикі ойды реттеу. Көп студент «менің ойым бар, бірақ жаза алмаймын» дейді. Осындай кезде ЖИ-ге өз ойыңды қалай бар – солай, шала-шарпы жазып бер де, «осыны логикалық тұрғыда реттеп бер, бірақ стилімді өзгертпе» деп сұра. Бұл – ең пайдалы әдістердің бірі. Сенің ойың қалады, тек құрылым пайда болады.

Төртінші әдіс – мысал мен өмірмен байланыстыру. ЖИ-ден «осы тақырыпқа студент өмірінен мысал келтір» деп сұра. Бірақ сол мысалды ойлап алмай, өз ортаңнан, өз тәжірибеңнен ұқсас жағдайды қос. Осылайша мәтін жасанды емес, тірі болады.

Бесінші әдіс – өз мәтініңе сын айтқызу. Мәтінді жазып болған соң, ЖИ-ге «мына мәтінде ой әлсіз жерлерді көрсет», «қай жері үстірт жазылған?» деп сұра. Бұл мұғалімнің орнына түзетіп беру емес, ойыңды тереңдетуге көмектесу.

Ең маңыздысы – ЖИ сен үшін ойламайды. Ол тек ойлануға итермелейді. Егер сен әр тапсырманы дайын жауаппен жаба берсең, ертең диплом жазғанда, пікір айтқанда, өмірде шешім қабылдағанда қиналасың. Ал егер ЖИ-ді ойыңды дамыту үшін қолдансаң, сенің жазуың да, сөзің де өзгереді.

Реферат тапсырма үшін керек шығар. Бірақ ой жаза білу – болашақ үшін керек. Жасанды интеллектіні таңдауың емес, қалай қолданатының маңызды.