ТҮРКІСТАН: 40-тан астам шенеунік тәртіптік жауапкершіліктерге тартылған

Түркістан облысында сыбайластықтың алдын алу шаралары қарқынды жүргізілуде, - деп хабарлайды ERNUR.KZ.

Түркістан облысында сыбайлас жемқорлық құқық бұзушылық фактісі туралы хабарлаған немесе сыбайлас жемқорлыққа қарсы іс-қимылда өзге де жолмен жәрдемдескен 9 тұлғаға 1,5 млн. теңге көлемінде ақшалай сыйақы берілді. Жалпы өңірде 1424 Call орталығына 73 азамат осы мәселеге қатысты шағым түсірген. Нәтижесінде 7 тұлғаның заңсыз әрекеті үшін қылмыстық іс қозғалған. Бұл туралы бүгін Өңірлік коммуникациялар қызметінде өткен брифингте ҚР Сыбайлас жемқорлыққа қарсы іс-қимыл агенттігінің Түркістан облысы бойынша Департаменті басшысының бірінші орынбасары Мирас Қарғабай мәлімдеді.

Оның айтуынша, 2020 жылдың 8 айында Департаменттің Тергеу басқарамасының қарауында 288 қылмыстық іс болса, оның 169-ы Агенттіктің Түркістан облыстық департаментімен тіркелген. Сондай-ақ, өндірісте болған істердің 184-і өндіріспен аяқталып, оның 42-сі сотқа жолданған.

«Атап айтқанда, биылғы жылдың 8 айында 75 ұсыныс жолданып, оның 64-і қаралып, 44 лауазымды тұлға түрлі деңгейдегі тәртіптік жауапкершіліктерге тартылған. Сотқа дейінгі тергеп-тексерудің бірыңғай тізіліміне жалпы 133 қылмыс тіркелсе, оның 99-ы сыбайлас жемқорлық қылмыстарына жатады. Бұл көрсеткішті өткен жылмен салыстырғанда қылмыс санының өскенін байқауға болады», – деді М.Қарғабай.

Айта кетейік, департамент мамандары өткен жылы бюджет қаражатын жымқыру дерегі бойынша 59 қылмыс анықтаған. Және анықталған қылмыстардың негізінде мемлекетке келтірілген залалдың жалпы құны 830,7 млн. теңгені құраған, оның 822,9 млн. теңгесі мемлекет бюджетіне толық қайтарылу арқылы 99,2 пайызы өндірілген.