ТҮРКІСТАН: Ауыл тұрғындарына лапароскопиялық холецистэктомия әдісімен ота жасалды

Түркістан облысындағы ауылдық жерлерде 70-ке жуық науқасқа лапароскопиялық холецистэктомия әдісімен ота жасалды, деп хабарлайды ERNUR.KZ.

Қазіргі таңдағы медицинаның басты мәселелерінің бірі – өт тас (ӨТА) ауруы. Ересек адамдар арасында 10-15% осы сырқатпен ауырады. Осыған орай Төлеби аудандық ауруханасында да лапароскопиялық холецистэктомия әдісімен бүгін кезекті ота жасалды.

Лапароскопиялық холецистэктомия – бүкіл әлемде ең жиі орындалатын операциялардың бірі және салыстырмалы түрде қауіпсіз. Бұл аз инвазивті әдіс, отадан кейінгі ауырсыну және қалпына келтіру кезеңі аз.

Облыстық Қоғамдық денсаулық басқармасының басшысы Марат Пашимов пен Төлеби аудандық ауруханасының Бас дәрігері Қарлығаш Умарова 2020 жылы аурухананың жарақат бөлімін құрал-жабдықтар мен материалдарын алуға ықпал еткен болатын. Нәтижесінде сол жылдың қазан айынан бастап науқастарға жергілікті ауруханада ота жасауға мүмкіндік туып отыр.

Сонымен қатар, жарақат бөлімінің меңгерушісі М.Жалабаевтың айтуынша, осы жылы 70-ке жуық науқасқа ота жасалды. Сәтті жасалынған ота нәтижесінде науқастар палатаға ауыстырылып, тұрақты емін алуда. Науқастардың қазіргі жағдайы жақсы.