Түркістан облысында бидайға орақ түсті

0
73

4 адам тұрақты жұмыспен, 10 адам маусымдық жұмыспен қамтылған.


Түркістан облысында бидайға орақ түсті

Түркістан облысында ауыл шаруашылығы қарқынды дамып келеді, деп хабарлайды ERNUR.KZ.


Биыл ауыл шаруашылығы дақылдары 873 мың гектарға егілді. Оның ішінде жаздық дақылдар – 497 мың гектар, күздік егіс – 202 мың гектар, ескі жоңышқа 175 мың гектарға егілген.


Түркістан облысының әкімі Дархан Сатыбалды Қазығұрт ауданына барып, осы саладағы жұмыстарды бақылады. «Қазығұрт Агро» ЖШС-нің егіс алқабын аралап, бидай ору барысын көрді, шаруалармен, сала басшыларымен пікір алмасты.


Егістік басында Ауыл шаруашылығы басқармасының басшысы Нұрбек Бадырақов пен Қазығұрт ауданының әкімі Азизхан Исмаиловтың есептері мен баяндамалары тыңдалды. «Қазығұрт Агро» ЖШС-нің басшысы Ержан Көбеев биылғы жұмыстары туралы айтып берді. 483 гектар жердің 350 гектарына бидай егілсе, қалғанына өзге өсімдіктер егілген. 4 адам тұрақты жұмыспен, 10 адам маусымдық жұмыспен қамтылған.


Облыс Түркістан облысының негізгі драйверлерінің бірі ауыл шаруашылығы саласы екенін атап өтті. Су үнемдеу технологияларын енгізу, жаңа тәсілдерді қолдану, егістікті әртараптандыру, жұмысты жүйелеу, ауыл шаруашылығы өнімдерін экспорттау мәселелері бойынша ой қозғап, жауаптыларға тиісті тапсырмалар берді.


Түркістан облысында көктемгі дала жұмыстарын жүргізуге 29,7 мың тонна жеңілдетілген жанар-жағармай бөлінген. Бүгінгі күнге 12,6 мың тонна дизель отыны тауар өндірушілерге босатылды. Сондай-ақ жиын терім жұмыстарына 23,3 мың тонна жанар-жағармай бөлінді, босату жұмыстары 1 аптада басталады.


88,3 мың тонна тыңайтқыш құнын субсидиялауға облыстық бюджеттен 7 млрд. теңге қаржы бөлінді. Сатып алынған отандық тыңайтқыштар құнының 60 %-ы, шетелдік тыңайтқыштардың 50 %-ы субсидиялануда. Шаруалар жаздық дақылдардың тұқымымен толық қамтамасыз етілген. Егіске қажетті 7,8 мың тонна масақты дақыл, 1,5 мың тонна мақсары, 2,6 мың тонна мақта және 1,5 мың тонна жоңышқа, 0,9 мың тонна жүгері тұқымдары пайдаланылды. Тұқым шаруашылығы қолдауға облыстық бюджеттен 600 млн. теңге қаржы бөлінді. Бүгінгі күнге 122 млн. теңгеге мақта, жүгері тұқымдары субсидияланды.


Облыстың климаттық ерекшелігіне орай, республикада алғашқы болып 282 мың гектарға егілген астықты ору науқаны басталды. Гектар түсімділігі 19 центнер болып, 534 мың тонна дән жинау күтіліп отыр. Бүгінгі күнге жоспарланған егіс көлемінің 39 мың гектары орылып, 80,0 мың тонна астық қамбаға құйылды.


Айта кетейік, биыл 3,1 млн. тонна көкөніс, бақша, картоп өнімдері жиналады деп күтіліп отыр. Бүгінгі күнге 740,0 мың тонна өнім жиналды. Атап айтқанда, 418 мың тонна көкөніс, 113 мың тонна бақша, 206 мың тонна картоп және 3,0 мың тонна жеміс-жидек теріп алынды.


Мемлекет басшысының тапсырмасы аясында Түркістан облысына 2030 жылға қарай су үнемдеу технологияларын 216,3 мың гектарға енгізу жоспарланған. Биыл жаңадан 22,0 мың гектарға су үнемдеу технологиялары орналастырылады. Жарты жылда 11,2 мың гектарға су үнемдеу технологиялары енгізілді. Су үнемдеу технологияларының қол жетімділігін арттыру бағытында жергілікті 2 кәсіпорын іске қосылды.