28 жылдық педагогикалық өтілі бар ұстаз 2019 жылдың «Үздік педагогы» атағын иеленген.
Түркістан облысының ұстазы Мемлекет басшысының қолынан марапат алды, деп хабарлайды ERNUR.KZ.
Ұстаздық – ұлы миссия. Осы бір қадірлі жолда аянбай еңбек етіп келе жатқан Түркістан облысы, Жетісай қаласының тәжірибелі педагогы Ұлжан Райымбекова Мемлекет басшысының қолынан «Қазақстанға еңбегі сіңген ұстаз» медалін алып, ел абыройын асқақтатты. Ұлжан Кеттешқызы – саналы ғұмырын білім беруге ғана емес, жас ұрпақты тәрбиелеуге де арнаған ұлағатты ұстаз. Орыс тілі мен әдебиеті пәнінің жоғары санатты маманы ретінде ол өзінің кәсіби шеберлігін дәлелдеген. 28 жылдық педагогикалық өтілі бар ұстаз 2019 жылдың «Үздік педагогы» атағын иеленген.
Ол – тек пәнді жетік меңгеріп қана қоймай, шәкірт жүрегіне жол таба білетін ерекше педагог. Оның тәлімі мен тәрбиесін көрген жүздеген шәкірт бүгінде ел игілігіне қызмет етіп жүр. Бұл марапат – ұзақ жылғы ерен еңбектің, жас ұрпаққа деген шексіз жанашырлық пен адалдықтың нәтижесі. Бұл тек Ұлжан апайдың емес, барша ұстаздар қауымының еңбегіне көрсетілген жоғары құрмет деп білеміз. Әрбір ұстаз үшін бұл – зор мәртебе, үлкен жауапкершілік.
Халықаралық деңгейде де мойындалған ұстаз Ұлжан Кеттешқызы – XIX Халықаралық Пушкин байқауының диплом иегері, Краснодарда өткен ғылыми-тәжірибелік конференцияның қатысушысы, АҚШ-тың Бостон қаласында ұйымдастырылған халықаралық конференцияда білімін көрсеткен педагог. Оның авторлығымен жарық көрген «Есть идея! Жақсы сабақтың он белгісі» атты әдістемелік құралы – жаңашыл педагогикалық ой-пікірлерге толы, сала үшін құнды еңбек. Ол әріптестерімен тәжірибе бөлісіп, білім беру сапасын арттыруда үнемі тың ізденіс үстінде жүр.
Сонымен қатар ол «Педагогическая слава» атты халықаралық энциклопедияның І дәрежелі медалі мен дипломының, ҚР БҒМ-нің алғыс хаты мен бірнеше марапаттардың иегері. «3-сыныпқа арналған орыс тілінен стандартты емес тапсырмалар» әдістемелік ұсынымы үшін де арнайы дипломмен марапатталған.
Ұлжан Райымбекова – білімімен де, адами болмысымен де дараланған тұлға. Оның еңбегі – жас ұрпаққа үлгі, болашаққа бағдар. Осындай педагогтарымыздың еңбегі бағаланып, ел алдында марапатталуы – білім саласына, ұстазға деген шынайы мемлекеттік құрметтің айқын көрінісі.
