Бұл ақпаратты Қазақстан Сыртқы істер министрлігі растады.
фото: ЖИ
ERNUR.KZ. Қазақстан азаматы Үндістанның Парадип портында жарты жылға жуық қамауда тұрған Unity танкерінен түсті. Қазір теңізші қонақүйде тұрып жатыр, деп жазады ulysmedia.kz.
Бұл ақпаратты Қазақстан Сыртқы істер министрлігі растады. Бұған дейін ведомство теңізшінің қонақүйден кейін Үндістаннан ұшып кететінін хабарлаған еді. Алайда оның нақты қай күні елге оралатыны айтылмады.
Контекст
Камерун туымен жүзген Unity танкері қаржылық дау салдарынан 11 мамырда Парадип порты маңында қамауға алынған. Теңізшілердің туыстарының айтуынша, кеменің иесі – Bluetide Charters FZE компаниясы.
Олардың сөзінше, экипаж мүшелеріне азық-түлік пен ауызсу жетіспеген. Сонымен қатар кемеде байланыс мәселелері туындап, түрлі ақаулар болған.
Одиша штатының Жоғарғы соты кеме иесінің теңізшілерді тастап кеткенін мойындап, Үндістан билігін экипаж мүшелерін еліне қайтаруға міндеттеген.
Қазан айының соңында экипаждың алғашқы жеті мүшесі танкерден түсірілді. Олардың алтауы – Ресей азаматы, біреуі – Мысыр азаматы. Сол кезде Қазақстан азаматы кемеде қалған еді.
3 қарашада танкерден тағы жеті теңізші түсірілді.
