​«Су перісі» – АРҚАҢЫЗДЫ аурудан ҚҰТҚАРАДЫ

Сурет: health.7days.ru

Арқа сүйектеріңіз, омыртқаңыз үнемі ауырып тұра ма? Бұл жайсыздықтан сізді бір ғана жаттығу құтқаруы мүмкін. Мәселен, «Су перісі».

Ол – әсіресе бір орында ұзақ уақыт отыруға мәжбүр адамдар (кеңсе қызметкерлері, тігінші, қолөнер шебері, т.с.с) үшін құтқарушы жаттығу. Таңертең немесе жұмыс арасында үзіліс жасап орындау өте пайдалы болмақ.

«Су перісі» пилатес жаттығулары кешеніне жатады. Оны жасау арқылы омыртқаның иілімділігі артады, қисаю қаупі азаяды. Сондай-ақ құрсақ бұлшықеттерін тонусқа келтіріп, нығайтады. Жаттығуды және оны жасау кезінде тыныс алуды дұрыс іске асырған жағдайда құрсақтың тік, көлденең және қиғаш бұлшықеттерін белсендіре аласыз.

Қалай орындалады?

«Су перісі» жаттығуын орындаудың классикалық техникасын үйреніңіз.

• Ол үшін аяғыңызды Z үлгісінде қойып отырыңыз (суретте). Оң аяқты алға, сол аяқты аздап артқа жіберіңіз. Ояң аяқтың табаны сол аяқтағы тізеге, ал сол аяқтың табаны жамбасқа тиіп тұруға тиіс. Сідір сүйектері еденге тиіп тұруы үшін денені тік ұстап отыру маңызды.
• Бойыңызды тіктеп отырып алғаннан кейін қолдарыңызды көтеріп, екі жаққа жайыңыз. Еденге параллель қалыпта ұстау қажет.
• Терең тыныс алыңыз да, баяу қимылмен денеңізді солға қарай иіңіз. Бұл кезде оң аяқтың алда, сол аяқтың артта тұруы маңызды. Иілу барысында қолдарыңызды да бірге сол бағытқа қарай жылжытасыз. Біртіндеп сол қолды еденге тірейсіз, ал оң қолды басыңыздан асыра солға қарай майыстыру керек. Омыртқа мен жамбас буындары қаншалықты майысуға мүмкіндік береді – соншалықты иілесіз.
• Бірер секундтан кейін демді шығара отырып, бастапқы қалыпқа келу керек.
• Енді аяқтардың орнын ауыстырып (сол аяқты алға, оң аяқты артқа), келесі кезекте оңға қарай иілу арқылы жаттығуды қайталайсыз.

Қате жібермеу маңызды

Бір қарағанда, «Су перісі» оңай жасалатындай көрінер. Алайда, көпшілік жиі жіберетін қателіктер бар, олардың салдарынан жаттығудың пайдасын емес, зиянын көріп жатады.

• Ең бірінші назар аудару керек нәрсе – денені бүгу. Көп адамдар оны тым қатты жасайды, қолымен еденге жетуге тырысады. Осы кезде омыртқаның кей бөліктеріне артық жүктеме түседі. Ал жаттығудың негізгі мәні – барынша қатты иілу емес, арқа сүйектеріне түсетін салмақты омыртқа бойына біркелкі салу.
• Жаттығуды орындағанда йога ережелерін еске түсіріп, қозғалыс амплитудасы мен қарқынын реттеуге тырысу. Барынша бірқалыпты, баяу қимылдау керек. Маңыздысы – бұлшықеттерді сезіну және жұмыс істету, артық күш салмау.
• Сондай-ақ, денеңізді бақылау өте маңызды. Егер денені бүгу кезінде жамбас сүйектері де бүйірге қарай қисаятын болса, техниканы бұзасыз.

Қарсы көрсетілімдері бар

«Су перісі» жаттығуын жасауға болмайтын жағдайлар бар. Айталық, жүктілік, қабыну процесі жүріп жатқан кез және отадан кейінгі қалпына келу кезеңдері осы тыйым аясына кіреді. Сондай-ақ, инфекциялық ауру жұқтырған жағдайда да толық айыққанша бұл жаттығуды кейінге қалдыру қажет.

Байқағаныңыздай, қарсы көрсетілім өте көп емес. Сондықтан, аталған жаттығуды жасауға кедергі де көп болмауға тиіс. Күнделікті жасасаңыз, өзіңізді жақсы сезінетініңіз анық. Арқа сүйектерінің ауыртпалығын емес, алғысын арқалаңыз.

Аударған: А. Мейірханқызы,

ERNUR.KZ

ОҚИ ОТЫРЫҢЫЗ:

ДЖАМПИНГ: фитнестің ЖАҢА бағыты жылдам АЗДЫРАДЫ